ارمیلا ماتونڈکر کا شادی کے 8 برس بعد شوہر سے طلاق لینے کا فیصلہ

بالی وُڈ کی معروف اداکارہ ارمیلا ماتونڈکر نے اپنے شوہر سے طلاق لینے کے لیے خلا کا دعویٰ دائر کر دیا ہے۔

انڈین ایکسپریس کے مطابق شادی کے آٹھ برس بعد اداکارہ نے شوہر محسن اختر میر سے علیحدگی اختیار کرنے کا فیصلہ کیا ہے۔

جوڑے کی جانب سے ممبئی کے علاقے بینڈرا میں طلاق کی ضابطے کی کارروائی کے لیے درخواست دائر کر دی گئی ہے۔

یہ خبریں بھی سامنے آرہی ہیں کہ ارمیلا ماتونڈکر اور محسن اختر میر کے درمیان علیحدگی کا فیصلہ مشترکہ نہیں ہے.

ٹائمز آف انڈیا کے مطابق 50 برس کی اداکارہ نے بہت سوچ بچار کے بعد علیحدگی کا فیصلہ کیا ہے، تاہم جوڑے کے درمیان طلاق کی وجوہات ابھی سامنے نہیں آسکی ہیں۔

دوسری جانب ارمیلا ماتونڈکر کے انسٹاگرام اکاؤنٹ پر نظر ڈالی جائے تو معلوم ہوتا ہے کہ وہ صرف 150 افراد کو انسٹاگرام پر فالو کرتی ہیں، تاہم ان میں اب محسن اختر میر شامل نہیں ہیں۔

البتہ ارمیلا ماتونڈکر نے انسٹاگرام سے شوہر محسن اختر میر کے ساتھ اپنی تصاویر تاحال نہیں ہٹائیں۔

اداکارہ کے انسٹاگرام پروفائل پر جوڑے کی ایک ساتھ آخری فوٹو 2023 میں عید کے موقع پر پوسٹ کی گئی تھی جس کے کیپشن میں ارمیلا ماتونڈکر نے لکھا تھا کہ ’امن اور ہم آہنگی کی تمام دعائیں قبول ہوں۔ محبت، مہربانی اور شفقت غالب ہو۔‘

ارمیلا ماتونڈکر نے سنہ 2016 میں کشمیری بزنس مین اور ماڈل محسن اختر میر کے ساتھ شادی کی تھی۔

رپورٹس کے مطابق ارمیلا ماتونڈکر اور محسن اختر میر کی ملاقات مشترکہ دوست منیش ملہوترا کے ذریعے ہوئی تھی، تاہم ان کی جانب سے اس معاملے پر تاحال خاموشی اختیار کی گئی ہے۔