پاکستان تحریک انصاف کے اسلام آباد میں ڈی چوک پر احتجاجی مظاہرے کے پیشِ نظر وفاقی دارالحکومت کے داخلی اور خارجی راستوں کو کنٹینرز لگا کر بند کر دیا گیا ہے جبکہ شہر کے اندر بھی رکاوٹوں کے باعث آمدورفت میں شہریوں کو دشواری ہے۔
پاکستان تحریک انصاف نے ’عدلیہ کی آزادی‘ اور سابق وزیراعظم عمران خان کی رہائی کے لیے آج جمعے کو اسلام آباد کے ریڈ زون میں واقع ڈی چوک پر احتجاجی مظاہرے کی کال دی ہوئی ہے۔
جمعے کی سہ پہر جب پی ٹی آئی کے کارکن ڈی چوک کے قریب جمع ہونا شروع ہوئے تو پولیس نے ان پر آنسو گیس کی شیلنگ کی اور متعدد افراد کو گرفتار بھی کیا ہے۔
---------------------------------------------------------------------------------
محسن نقوی کی زیرصدارت وزارت داخلہ میں اہم اجلاس
پاکستان تحریک انصاف کے احتجاج کے پیش نظر وزیر داخلہ محسن نقوی نے پولیس افسران کو وزارت داخلہ کے آر بلاک طلب کر لیا۔
محسن نقوی کی زیرصدارت وزارت داخلہ میں اہم اجلاس چل رہا ہے جس میں آئی جی اسلام آباد، ڈی آئی جی آپریشن اور اعلٰی افسران شامل ہیں۔
اجلاس میں احتجاج کے پیش منظر پیدا ہونے والی صورتحال کا جائزہ لیا جائے گا۔
-----------------------------------------------------------------------------
عمران خان کی بہنیں ڈی چوک سے گرفتار
سابق وزیراعظم اور بانی پاکستان تحریک انصاف عمران خان کی بہنوں کی اسلام آباد پولیس نے گرفتار کر لیا ہے۔
علیمہ خان اور عظمیٰ خان کو پولیس نے ڈی چوک سے گرفتار کیا ہے۔ دونوں بہنوں کو تھانہ سیکریٹریٹ منتقل کر دیا گیا ہے۔
---------------------------------------------------------------------------------
اب تک 30 سے زائد افراد کو گرفتار کیا جا چکا ہے: آئی جی اسلام آباد
آئی جی اسلام آباد علی ناصر رضوری نے کہا ہے کہ اسلام آباد سے اب تک 30 سے زائد افراد کو گرفتار کیا جا چکا ہے۔
جمعے کو میڈیا سے بات کرتے ہوئے انہوں نے کہا کہ کسی کو قانون ہاتھ میں لینے کی اجازت نہیں دیں گے۔
--------------------------------------------------------------------------------
جب کوئی مہمان آتا ہے تو پی ٹی آئی کو احتجاج کیوں یاد آتا ہے؟ مصدق ملک
وفاقی وزیر پیٹرولیم مصدق ملک نے پاکستان تحریک انصاف (پی ٹی آئی) کے احتجاج کے حوالے سے کہا ہے کہ جب کوئی مہمان آتا ہے تو آپ کو احتجاج کیوں یاد آتا ہے؟
جمعے کو اسلام آباد میں پریس کانفرنس کرتے ہوئے مصدق ملک نے پی ٹی آئی کو مخاطب کرتے ہوئے کہا کہ کسی خاص وقت میں ہی آپ کے خط بھی منظر عام پر آتے ہیں، ترقی کا سفر کس سے نہیں برداشت ہو رہا ہے؟
انہوں نے کہا کہ ’پی ٹی آئی کنٹینر سے اتری اور سی پیک کو تباہ کرنے کی کوشش کی۔ ہم نے سوچا شاید سیاست میں نئے نئے آئے ہیں تو تباہی کر گئے۔‘
-----------------------------------------------------------------------------------
وزیراعلٰی علی امین گنڈا پور کا قافلہ پشاور موٹروے سے اسلام آباد کی جانب رواں
وزیراعلٰی علی امین گنڈا پور کا قافلہ پشاور موٹروے سے اسلام آباد کی جانب بڑھ رہا ہے۔
پی ٹی آئی کے مطابق وزیراعلٰی علی امین گنڈا پور کا قافلہ چھچھ انٹرچینج پہنچ گیا ہے۔
وزیراعلی اپنی گاڑی سے اترکر کنٹینر پر چڑھ گئے ہیں۔
------------------------------------------------------------------------------
ہر چوتھے روز اسلام آباد پر دھاوا بولنے کی اجازت نہیں دے سکتے، وزیر داخلہ محسن نقوی
وفاقی وزیر داخلہ محسن نقوی نے کہا ہے کہ پاکستان تحریک انصاف دارالحکومت پر دھاوا بولنے آ رہی ہے، ان کے پاس پورا صوبہ ہے جتنا احتجاج کرنا ہے وہاں کر لیں۔
ڈی چوک میں صحافیوں سے بات کرتے ہوئے محسن نقوی نے پی ٹی آئی کے حوالے سے کہا کہ ’ہر چوتھے روز کہیں کہ بندے لا رہے ہیں اور اسلام آباد آنے دیں تو دھاوا بولنے کی اجازت نہیں دے سکتے۔‘
ایک سوال کے جواب میں کہ علی امین گنڈا پور کی قیادت میں آنے والے قافلوں سے کیسے نمٹیں گے، اس پر محسن نقوی کہا کہ ’ہماری سٹریٹیجی نظر آ جائے گی، پہلے نہیں بتا سکتے۔‘
انہوں نے کہا کہ اگر پی ٹی آئی کے قافلے اجازت کے ساتھ اسلام آباد آتے تو انہیں آئین کے مطابق پروٹوکول دیا جاتا لیکن موجودہ صورتحال میں وہ دارالحکومت پر دھاوا بول رہے ہیں۔
----------------------------------------------------------------------------
چھوٹے موٹے احتجاج ہوتے رہتے ہیں، کوئی فرق نہیں پڑتا: وزیر اطلاعات عطا تارڑ
وفاقی وزیر اطلاعات عطا اللہ تارڑ نے کہا ہے کہ چھوٹے موٹے احتجاج ہوتے رہتے ہیں، اس سے کوئی فرق نہیں پڑتا بلکہ اصل چیز معیشت کا آگے بڑھنا ہے۔
جمعے کو اسلام آباد میں پریس کانفرنس سے خطاب میں عطا تارڑ نے کہا کہ ان کو وزیر اعلٰی خیبر پختونخوا علی امین گنڈا پور کو مشورہ ہے کہ صوبے میں بہت سے کام کرنے کے ہیں اور کام کریں، کرائے کم کریں، دہشت گردی پر اجلاس بلائیں، لیڈی ریڈنگ ہسپتال کو نیا کریں۔
---------------------------------------------------------------------------
پی ٹی آئی کے کارکنان پشاور موٹروے پرپہنچنا شروع
پی ٹی آئی کے کارکنان پشاور موٹر وے پر جمع ہونا شروع ہو گئے ہیں۔ کارکنوں کو 11 بجے قافلوں کی صورت میں آنے کی ہدایت کی گئی تھی۔
وزیراعلٰی خیبر پختونخوا علی امین گنڈا پور قافلوں کی قیادت کریں گے۔
مالاکنڈ اور ہزارہ سے آنے والے قافلوں کو صوابی موٹروے پر وزیراعلٰی کے قافلے کا انتظار کرنے کا کہا گیا ہے۔
جنوبی اور قبائلی اضلاع کے قافلے بھی صوابی انٹرچینج کے قریب پہنچ چکے ہیں۔
پی ٹی آئی نے کارکنوں کے لیے صوابی کے قریب موٹر وے سروس ایریا کے مقام پر استقبالیہ کیمپ لگا دیا ہے۔
خیبرپختونخواہ کے مختلف اضلاع سے سرکاری مشینری گزشتہ رات کو سروس ایریا میں پہنچا دی گئی تھی۔
سرکاری مشینری میں ریسکیو 1122 کی ایمبولینس، فائر وہیکل، کرین اور دیگر گاڑیاں شامل ہیں۔
ضلع دیر سے اسلام آباد آنے والے پی ٹی آئی کے تین کارکنان کو جمعے کی صبح پولیس نے ڈی چوک سے گرفتار کیا ہے۔
----------------------------------------------------------------------------------------------------------
علی امین گنڈاپوار سیاسی شو نہیں فساد پھیلانے آ رہے ہیں، عظمیٰ بخاری
وزیر اطلاعات پنجاب عظمیٰ بخاری نے کہا ہے کہ علی امین گنڈا پور کرینوں، لفٹر اور سرکاری وسائل و سرکاری ملازمین کے ساتھ اسلام آباد پر چڑھائی کرنے آ رہے ہیں۔
انہوں نے کہا کہ کیا اس قسم کی مشینری کے ساتھ سیاسی جدوجہد ہوتی ہے، علی امین سیاسی شو نہیں فساد پھیلانے آ رہے ہیں۔
وزیر اطلاعات نے مزید کہا کہ ان کی پلاننگ ہے کہ لاشیں گریں اور اس کو کیش کریں۔
انہوں نے مزید کہا کہ صوبہ پنجاب مکمل طور پر پرامن اور پرسکون حالات میں ہے، پنجاب کے لوگوں نے فتنہ فساد کی سیاست کو مسترد کر دیا ہے۔
------------------------------------------------------------------------------------------
موٹر وے سمیت انٹری اور ایگزٹ پوائنٹس بند
موٹر وے ایم ون پر اسلام آباد سے انٹری اور ایگزٹ پوائنٹس بند ہیں جبکہ اسلام آباد میں ریڈ زون کے داخلی راستوں کو بھی کنٹینر لگا کر بند کر دیا گیا ہے۔ اس کے علاوہ فیض آباد، سیکٹر آئی ایٹ، آئی جے پی روڈ کے علاوہ مارگلہ روڈ پر بھی کنٹینرز سے راستے بند ہیں۔
مری روڈ سمیت اسلام آباد ایکسپریس وے سنگجانی، سیکٹر جی الیون چوک، گولڑہ موڑ، 26 نمبر چونگی بند جبکہ ٹیکسلا کے مقام پر بھی کنٹینرز لگے ہوئے ہیں۔
میٹرو بس انتظامیہ نے بھی جڑواں شہروں میں آج میٹرو بس سروس معطل رکھنے کا اعلان کیا ہے۔
جڑواں شہروں میں تعلیمی ادارے بند اور موبائل فون سروس معطل
احتجاج اور راستوں کی بندش کے باعث جڑواں شہروں میں آج نجی تعلیمی ادارے بند رکھنے کا اعلان کیا گیا ہے جبکہ موبائل فون سروس بھی معطل ہے۔
اسلام آباد میں موٹر سائیکل کی ڈبل سواری پر پابندی عائد
اسلام آباد انتظامیہ نے موٹر سائیکل کی ڈبل سواری پر پابندی عائد کر دی ہے۔ اس پابندی کا اطلاق آج اور کل سنیچر کو بھی رہے گا۔
پنجاب کے 4 شہروں میں دفعہ 144 نافذ، رینجرز طلب
ترجمان محکمہ داخلہ پنجاب کی جانب سے جاری بیان میں کہا گیا ہے کہ صوبے کے 4 شہروں لاہور، راولپنڈی، اٹک اور سرگودھا میں دفعہ 144 نافذ ہے جبکہ لاہور، راولپنڈی اور اٹک میں رینجرز کو بھی طلب کر لیا ہے۔
حکومت پنجاب نے ہر قسم کے سیاسی اجتماعات، دھرنے، جلسے، مظاہرے، احتجاج اور ایسی تمام سرگرمیوں پر پابندی عائد کی ہے۔
ترجمان کے مطابق راولپنڈی اور اٹک میں 4 اور 5 اکتوبر کے لیے رینجرز کی 6 کمپنیوں کی خدمات طلب کی گئی ہیں۔
