’یہ ہماری دعاؤں کا جواب ہے‘، دیپیکا پاڈوکون اور رنویر سنگھ نے بیٹی کا نام اور تصویر شیئر کر دی

انڈین اداکارہ دیپیکا پاڈوکون اور رنویر سنگھ نے مذہبی تہوار دیوالی کے موقعے پر سوشل میڈیا پر اپنی بیٹی کی پہلی تصویر شیئر کرتے ہوئے اس کا نام اور اس نام کا مطلب بھی بتایا ہے۔

بالی وُڈ کی معروف اداکارہ دیپیکا پاڈوکون نے جمعے کو اپنی بیٹی کی تصویر انسٹاگرام پر پوسٹ کی اور بتایا کہ انہوں نے اپنی بیٹی کا نام ’دعا پاڈوکون سنگھ‘ رکھا ہے۔

اداکارہ نے بیٹی کے نام کا مطلب بتاتے ہوئے لکھا کہ ’دعا‘ نام کا مطلب التجا ہے اور ’یہ ہماری دعاؤں کا جواب ہے۔‘

اداکار جوڑے نے خوشی کا اظہار کرتے ہوئے مزید لکھا کہ ’ہمارے دل محبت اور شکر گزاری سے بھرے ہوئے ہیں۔‘

دیپیکا اور رنویر نے انسٹاگرام کی اس تصویر میں اپنی بیٹی کو سرخ روایتی لباس میں ملبوس دکھایا، جس میں بچی کے پاؤں نظر آ رہے ہیں۔

انسٹاگرام پر اس پوسٹ پر مداحوں اور مشہور شخصیات نے نئے خاندان کو محبت اور دعاؤں سے نوازا ہے۔ بالی وڈ کے معروف اداکار شجیت سرکار، عالیہ بھٹ، پریانکا چوپڑا اور کرن جوہر جوڑے کو مبارکباد دینے والوں میں شامل ہیں۔

دیپیکا پاڈوکون اور رنویر سنگھ روہت شیٹی کی ہدایت کاری میں بننے والی فلم ’سنگھم اگین‘ میں بھی نظر آئیں جو آج سینما گھروں میں نمائش کے لیے پیش کی گئی ہے۔

’سنگھم اگین‘ میں ان کے ساتھ اجے دیوگن، ارجن کپور، اکشے کمار، کرینہ کپور اور ٹائیگر شراف بھی شامل ہیں۔