سعودی ولی عہد شہزادہ محمد بن سلمان سے فرانسیسی صدر کی ملاقات

سعودی ولی عہد و وزیراعظم شہزادہ محمد بن سلمان سے پیر کوفرانسیسی صدر ایمانوئل میکخواں نے ملاقات کی ہے۔

ایس پی اے کے مطابق ریاض کے قصر الیمامہ میں فرانسیسی صدر کے خیرمقدم کےلیے باضابطہ سرکاری تقریب کا اہتمام کیا گیا۔

ملاقات کے دوران سعودی عرب اور فرانس کے درمیان دوطرفہ تعلقات کا جائزہ اور مختلف شعبوں میں تعاون بڑھانے کی مشترکہ کوششوں پر تبادلہ خیال کیا گیا۔

انہوں نے باہمی مفادات کے حصول کےلیے دونوں ملکوں میں دستیاب وسائل کی سرمایہ کاری کے مواقع تلاش کیے۔

علاقائی اور بین الاقوامی صورتحال، مشترکہ تشویش کے امور اور اس حوالے سے کی جانے والی کوششوں پر بھی بات چیت کی گئی۔

بعد ازاں شہزادہ محمد بن سلمان اور فرانسیسی صدر کی موجودگی میں سعود ی عرب اور فرانس کے درمیان سٹریٹجک پارٹنر شپ کونسل کی تشکیل کے لیے مفاہمتی یادداشت پر دستخط کیے گئے۔

 سعودی وزیرخارجہ شہزادہ فیصل بن فرحان اور فرانسیسی وزیر برائے یورپ اور امور خارجہ جین نویل باروٹ نے دستخط کیے۔

قبل ازیں صدر ایمانوئل میکخواں ریاض پہنچنے تو کنگ خالد انٹرنیشنل ایئرپورٹ پر نائب گورنر شہزادہ محمد بن عبدالرحمن، وزیر تجارت ماجد القصبی اور ریاض کے میئر شہزادہ فیصل بن عبدالعزیز بن عیاف نے خیرمقدم کیا۔

فرانس میں سعودی سفیر فہد بن معیوف الرویلی اور مملکت میں فرانسیسی سفیر بھی موجود تھے۔

صدر ایمانوئل میکخواں دورے کے دوران واٹر سمٹ، سعودی، فرانسیسی اکنامک فورم میں شرکت، ریاض میٹرو پروجیکٹ، الدرعیہ اور العلا گورنریٹ کا بھی دورہ کریں گے۔

فرانسیسی صدر کا تین روزہ سرکاری دورہ دونوں ملکوں کے درمیان مضبوط تعلقات کا ثبوت ہے۔

ولی عہد محمد بن سلمان کی دعوت پر ان کا دورہ مختلف شعبوں میں تعاون کو بڑھانے، سعودی وژن 2030 اور فرانس 2030 کے ساتھ ہم آہنگ ہونے کے مشترکہ عزم کو ظاہر کرتا ہے۔