سعودی ولی عہد شہزادہ محمد بن سلمان سے ریاض میں برطانوی وزیراعظم کی ملاقات

سعودی ولی عہد و وزیراعظم شہزادہ محمد بن سلمان سے پیر کو برطانوی وزیراعظم کیئر سٹارمر نے ملاقات کی ہے۔

ایس پی اے کے مطابق ریاض کے قصر الیمامہ میں شہزادہ محمد بن سلمان نے برطانوی وزیراعظم کا خیرمقدم کیا، باضابطہ سرکاری تقریب کا اہتمام کیا گیا۔

بعد ازاں سعودی ولی عہد نے برطانوی وزیراعظم سے باضابطہ ملاقات کی۔

دونوں رہنماوں نے سعودی عرب اور برطانیہ کے دوطرفہ تعلقات، مختلف شعبوں میں تعاون کے پہلووں کو بڑھانے کےلیے مشترکہ ہم آہنگی کی کوششوں اور دونوں ملکوں میں دستیاب وسائل کی سرمایہ کاری کرنے کے مواقع کا جائزہ لیا۔

بین الاقوامی صورتحال، مشترکہ مفادات کے امور اور اس حوالے سے کی جانے والی کوششوں پر بھی تبادلہ خیال کیا گیا۔

اس موقع پر وزیرتوانائی شہزادہ عبدالعزیز بن سلمان، برطانیہ میں سعودی سفیر شہزادہ خالد بن بندر بن سلطان، وزیر مملکت اور کابینہ کے رکن شہزادہ ترکی بن محمد بن فہد، ریاض ریجن کے نائب گورنر شہزادہ محمد بن عبدالرحمن اور دیگر وزرا اور حکام موجود تھے۔

قبل ازیں برطانوی وزیراعظم کیئر سٹارمر پیر کو سرکاری دورے پر سعودی عرب پہنچے تو ریاض کے کنگ خالد انٹرنیشنل ایئرپورٹ پر نائب گورنر شہزادہ محمد بن عبداالرحمن اور برطانیہ میں سعودی سفیر شہزادہ خالد بن بندر بن عبدالعزیز نے ان کا خیرمقدم کیا۔

گورنر وزیر تجارت ڈاکٹر ماجد القصبی، مملکت میں برطانوی سفیر نیل کرومپٹن اور دیگرعہدیدار بھی موجود تھے۔

علاوہ ازیں برطانوی وزیراعظم ایک روزہ دورے کے بعد پیر کی شب روانہ ہوگئے، ریاض ریجن کے نائب گورنر نے انہیں رخصت کیا۔