اسرائیلی مظالم کی آگ پورے خطے کو لپیٹ میں لے سکتی ہے: وزیراعظم

پاکستان کے وزیراعظم شہباز شریف نے کہا ہے کہ ’اسرائیلی مظالم سے ایسی آگ بھڑک رہی ہے جو پورے خطے کو اپنی لپیٹ میں لے سکتی ہے۔‘
جمعرات کو مصر کے دارالحکومت قاہرہ میں ڈی ایٹ کے سربراہی اجلاس سے خطاب کرتے ہوئے ان کا کہنا تھا کہ ’اسرائیلی جارحیت غزہ اور لبنان کے بعد شام تک پہنچ چکی ہے۔‘
شہباز شریف نے مزید کہا کہ ’اسرائیل کے بے دریغ مظالم غزہ میں تباہی مچانے کے بعد اب مغربی کنارے تک پھیل چکے ہیں۔‘

’اکتوبر 2023 سے غزہ میں جو کچھ ہو رہا ہے وہ تاریخ کا سیاہ باب ہے، یہ ایک بہت بڑا انسانی المیہ ہے جس کا تصور بھی انتہائی خوف ناک ہے۔‘
وزیراعظم شہباز شریف کا یہ بھی کہنا تھا کہ ’پاکستان نے غزہ، لبنان اور شام کے خلاف اسرائیلی جارحیت کی مذمت کی ہے۔‘
انہوں نے کہا کہ ’اسرائیل کی جانب سے اقوام متحدہ ریلیف اینڈ ورکس ایجنسی فار فلسطین کے خلاف کارروائی بھی قابل مذمت ہے۔‘
شہباز شریف کا کہنا تھا کہ ’اقوام متحدہ ریلیف اینڈ ورکس ایجنسی فار فلسطین، غزہ اور مغربی کنارے میں اسرائیلی مظالم سے متاثر لاکھوں بے بس فلسطینیوں کے لیے ایک  لائف لائن ہے۔‘
’پاکستان نے بین الاقوامی قانون، اقوام متحدہ کی سلامتی کونسل اور او آئی سی کی قراردادوں کے مطابق مشرق وسطیٰ میں پائیدار امن کے لیے منصفانہ، جامع اور دیرپا دو ریاستی حل کی مسلسل وکالت کی ہے۔‘
وزیراعظم نے کہا کہ ’1967 سے پہلے کی سرحدوں کی بنیاد پر ایک قابل عمل، خودمختار ریاست قائم کی جائے جس کا دارالحکومت القدس ہو۔‘

’ہمیں غزہ، مغربی کنارے، لبنان اور دیگر جنگ زدہ علاقوں کی بحالی اور تعمیر نو کے لیے فنڈز کی فراہمی پر غور کرنا چاہیے۔‘
وزیراعظم شہبازشریف نے بتایا کہ ’پاکستان ان ممالک میں شامل ہے جنہوں نے مصر اور اردن کے راستے فلسطین کے لیے امدادی سامان روانہ کیا ہے۔‘
’ہمیں اس امدادی کام کو جاری رکھنا چاہیے تاکہ جنگ سے متاثرین کی بقا کو یقینی بنایا جا سکے۔ دنیا کو غزہ کے بے گناہ لوگوں کی آواز کو سننا چاہیے۔‘
ان کا مزید کہنا تھا کہ ’پاکستان جنگ بندی کے حصول کے لیے بین الاقوامی ثالثی کی تمام کوششوں کی حمایت کرتا ہے۔‘
شہباز شریف نے غزہ کی صورت حال پر ڈی ایٹ کا سربراہی اجلاس بلانے پر مصر کے صدر عبدالفتاح السیسی کا شکریہ ادا کیا۔
وزیراعظم شہبازشریف تین روزہ سرکاری دورے پر قاہرہ میں ہیں جہاں وہ آٹھ ترقی پذیرملکوں کے گیارہویں سربراہ اجلاس میں شریک تھے۔