ریاض میٹرو رات بارہ سے صبح چھ بجے تک کہاں جاتی ہے؟

سعودی دارالحکومت کے شہریوں اور رہائشیوں کے لیے ریاض میٹرو ایک اہم ضرورت بن گئی، اس کے تمام چھ ٹریک کھولے جانے کے بعد  لوگوں کی بڑی تعداد دفاتر یا تعلیمی اداروں میں جانے کے لیے میٹرو استعمال کررہی ہے۔

ریاض میٹرو صبح چھ سے رات 12 بجے تک سفر پر رہتی ہے جبکہ رات 12 سے صبح 6 بجے تک سروس معطل رہتی ہے۔ یہ سوال کیا جا رہا ہے اس وقت ریاض میٹرو کہاں ہوتی ہےـ

اخبار 24 نے ریاض میٹرو کے اعلی عہدیداروں سے رابطہ کیا  اور اس بارے میں تمام تفصیلات حاصل کیں۔

 جب یہ سوال کیا گیا کہ کیا میٹرو رات بارہ سے صبح 6 بجے تک سوتی ہے؟ تو اس کے جواب میں کہا گیا ’جی ہاں میٹرو سوتی ہے اور جب یہ آپریشن میں ہوتی ہیں تو اسے جاگنے کا وقت کہا جاتا ہے۔‘

ریاض میٹرو میں انرجی سسٹمز کے انفرا سٹرکچر مینٹیننس کے ڈائریکٹر انجینیئر محمد العقل نے بتایا ’میٹرو کا آٖپریشنل سفر رات بارہ بجے ختم ہوتا ہے، اس کے بعد میٹرو اپنے مراکز میں واپس آتی ہیں۔ اس دوران اگلی صبح میٹرو کے دوبارہ سروس میں آنے سے پہلے کئی طریقہ کار مکمل کیے جاتے ہیں‘۔

محمد العقل نے کہا کہ ’رات بھر سٹاپ کے دوران میٹرو کی جانچ کی جاتی ہے اگرچہ یہ الیکٹرک سے چلتی ہے مگر اس میں ایسے انجن ہوتے ہیں جنہیں وقتا فوقتا تبدیل کرنے کی ضرورت رہتی ہے اس کے علاوہ میٹرو میں موٹرز اور اے سی سسٹم  ہوتا ہے جنہیں چیک کیا جاتا ہے، میٹرو کے اندرونی حصے کو سینیٹائز کرنا بھی ضروری ہوتا ہے‘۔

’میٹرو کی سیفٹی اور کارکردگی یقینی بنانے کے لیے تمام ضروری اور اہم خدمات فراہم کی جاتی ہیں۔ 7 مراکز ایسے ہیں جہاں اگر میٹرو میں کسی خرابی کا پتہ چلتا ہے تو اسے وہیں درست کردیا جاتا ہے، اس میں زیادہ وقت نہیں لگتا۔

محمد العقل کا کہنا تھا ’سب سے بڑا چیلنج محدود وقت میں میٹرو کی مینٹیننس ہے۔ جس کے بعد صبح چھ بجے سے رات 12 بجے تک میٹرو چلتی ہے۔ رات 12 سے ایک  بجے کے درمیان میٹرو اپنے سٹیشنوں پر واپس آجاتی ہیں اور صبح ساڑھے 4 سے 6 بجے تک ٹیسٹنگ کا دورانیہ ہوتا ہے۔ محدود وقت میں تمام کام پابندی سے کیے جاتے ہیں‘۔

واضح رہے کہ اس میگا پروجیکٹ میں 190 انجن اور 452 ڈبے ہیں جو سیمنز (جرمنی)، بمبارڈیئر (کینیڈا) اور السٹم (فرانس) نے تیارکیے ہیں۔ اس کے علاوہ نیٹ ورک کے مختلف راستوں پر 19 پارکنگ ایریا بھی ہیں۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں