سعودی عرب کے القصیم ریجن میں بنائےگئے ’واحۃ بریدہ ‘(بریدہ کا نخلستان) کو گنیز بک آف ورلڈ ریکارڈ میں درج کرلیا گیا۔
سعودی خبررساں ادارے ’ایس پی اے‘ کے مطابق القصیم ریجن کے گورنر شہزادہ ڈاکٹر فیصل بن مشعل بن سعود بن عبدالعزیز نے’بریدہ اوایسس‘ سرٹیفکیٹ گنیز بک کے نمائندے سے وصول کیا۔
گورنر قصیم نے عالمی ماحولیاتی کامیابی پر تمام شعبوں اور سرکاری اداروں کو مبارک باد دی جن کی مثالی کاوشوں سے بریدہ میں بنائے گئے نخلستان کو دنیا کا سب سے بڑا نخلستان قرار دیا گیا۔
گورنر قصیم نے کہا’ نخلستان میں پودوں کا حصہ بڑھانے اور آبپاشی کی جدید سہولتوں کی بدولت یہ علاقہ ایک نمونہ بن گیا ہے جو مملکت کے وژن 2030 کے اہداف کے حصول میں معاون ثابت ہوگا‘۔
نیشنل واٹر کمپنی کے سی ای او ڈاکٹر فواد آل الشیخ مبارک نے کہا ’یہ کامیابی سعودی گرین انشیٹیو کے تحت ہوئی ہے۔ بریدہ نخلستان 19 ملین مربع میٹررقبح پر محیط ہے، جہاں جدید ترین آبپاشی نیٹ ورک 3 ملین میٹر کے دائرے پر پھیلا ہوا ہے‘۔
انہوں نے کہا کہ ’وسیع رقبے پر بنائے جانے والے نخلستان سے کاربن کے اخراج میں نمایاں کمی ہوئی جو تحفظ ماحولیات کے لیے اہم ثابت ہوگا۔ ماحولیاتی تحفظ کے حوالے سے یہ منصوبہ ایک مثال بن کر سامنے آیا ہ ۔ جدید آبپاشی سسٹم سے پانی کے استعمال کو بھی کم کیا جاسکتا ہے‘۔
شہزادہ فیصل بن مشعل مرکز برائے تحفظ نباتات کے ڈائریکٹر ڈاکٹر عبدالرحمن الصقیر نے کہا ’بریدہ نخلستان ایک قومی کامیابی ہے جو سعودی گرین انشیٹو کے اہداف حاصل کرنے کے لیے ہے۔
انٹرنیشنل تنظیم ’فاو‘ کے ڈائریکٹر ڈاکٹر سامی البریہ نے کہا ’بریدہ نخلستان نے پائیدار ترقی کے چار اہداف سسٹین ایبل ڈیولپمنٹ گولز (ایس ڈی جیز) حاصل کیے ہیں ان میں صاف اور قابل استعمال پانی، معاشی ترقی، روزگار کے مواقع پیدا کرنا، حیاتیاتی تنوع اور قومی معیشت کی حمایت شامل ہے‘۔
سعودی وزارت ماحولیات و پانی و زراعت کی القصیم شاخ کے جنرل ڈائریکٹر انجینیئر سلمان الصوینع نے کہا ’بریدہ نخلستان مملکت میں سب سے اہم ماحولیاتی اور سیاحتی منصوبوں میں سے ایک بن گیا ہے۔ یہاں 200 مقامات کو پارکوں کے لیے مخصوص کیا گیا ہے جو ماحولیاتی سیاحت کو فروغ دینے اور معیار زندگی کو بڑھانے میں اہم کردار ادا کررہے ہیں‘۔
