شہباز شریف اور اماراتی صدر کی ملاقات، مشرق وسطیٰ میں دو ریاستی حل پر زور

وزیرِاعظم پاکستان شہباز شریف نے ابوظبی میں متحدہ عرب امارات کے صدر شیخ محمد بن زاید النہیان سے ملاقات کی۔ ملاقات میں چیف آف آرمی سٹاف جنرل عاصم منیر بھی شریک تھے۔
منگل کو ابوظبی کے قصر الشاطی میں ہونے والی ملاقات میں شہباز شریف اور شیخ محمد بن زاید النہیان نے دو طرفہ تعلقات کو مزید فروغ دینے پر تبادلہ خیال کیا۔
قصر الشاطی آمد پر متحدہ عرب امارات کے صدر شیخ محمد بن زاید النہیان نے وزیرِاعظم شہباز شریف کا استقبال کیا۔

ملاقات میں اقتصادی، تجارتی اور دیگر شعبوں میں دونوں ممالک کے درمیان موجود اشتراک و تعاون پر گفتگو کی گئی جو پائیدار اقتصادی ترقی اور خوش حالی کے لیے دونوں ممالک کے ویژن سے ہم آہنگ ہے۔
پاکستان کے وزیراعظم اور اماراتی صدر نے مشرق وسطیٰ میں ہونے والی پیش رفت سمیت باہمی دلچسپی کے متعدد علاقائی اور بین الاقوامی امور پر بھی تبادلہ خیال کیا۔
ملاقات میں علاقائی سلامتی، استحکام اور امن کو برقرار رکھنے کے لیے دو ریاستی حل پر مبنی جامع اور دیرپا امن کے لیے بین الاقوامی کوششوں کو تیز کرنے کی ضرورت پر زور دیا گیا۔
دونوں رہنماؤں نے گورننس میں عالمی رجحانات کی نشان دہی اور عالمی تبدیلیوں کے چیلنجز سے نمٹنے کے لیے حکومتی تیاریوں کی قابلِ عمل حکمت عملی پر ورلڈ گورنمنٹس سمٹ کی اہمیت پر بھی گفتگو کی۔  
واضح رہے کہ وزیراعظم شہباز شریف ورلڈ گورنمنٹس سمٹ 2025 میں شرکت کے لیے متحدہ عرب امارات کے دورے پر ہیں۔ یہ سربراہی اجلاس منگل کو دبئی میں شروع ہو گیا ہے جس کا موضوع ’شیپنگ فیوچر گورنمنٹس‘ ہے۔