العلا کانفرنس فار ایمرجنگ مارکیٹ اکانومیز: وزیر خزانہ سعودی عرب روانہ

وزیر خزانہ محمد اورنگزیب پہلی اعلیٰ سطح کی سالانہ ’العلا کانفرنس فار ایمرجنگ مارکیٹ اکانومیز‘ میں شرکت کے لیے سعودی عرب روانہ ہو گئے ہیں۔ 

اسلام آباد میں سنیچر کو وزارتِ خزانہ کی جانب سے جاری بیان کے مطابق وزیر خزانہ سعودی عرب کے قدیم تاریخی شہر العلا میں 16 فروری سے شروع ہونے والی دو روزہ کانفرنس میں شرکت کریں گے۔

پاکستان کے وزیر خزانہ اپنے سعودی ہم منصب محمد الجدان کی خصوصی دعوت پر سعودی عرب کا دورہ کر رہے ہیں۔

’العلا کانفرنس فار ایمرجنگ مارکیٹ اکانومیز‘ انٹرنیشنل مانٹری فنڈ (آئی ایم ایف) اور سعودی وزارت خزانہ کے باہمی اشتراک سے منعقد کی جا رہی ہے۔ 

کانفرنس میں مجموعی طور پر نو نشستیں ہوں گی جن میں 200 شرکاء اور 36 مقررین شریک ہوں گے۔ کانفرنس میں 48 ممالک کو مدعو کیا گیا ہے۔ 

کانفرنس میں محمد اورنگزیب کی خصوصی شرکت ان پالیسی اقدامات کے تناظر میں ہے جن کی بدولت پاکستانی معیشت میں استقلال اور مثبت سازگار تبدیلیاں رونما ہوئیں۔ 

وزیر خزانہ ’اُبھرتی ہوئی پر استقلال منڈیوں کا راستہ‘ کے موضوع پر ایک اعلیٰ سطح کے پینل مباحثے میں شریک ہوں گے۔ 

آئی ایم ایف کی منیجنگ ڈائریکٹر کرسٹالینا جارجیوا پینل مباحثے کی میزبانی کریں گی۔ 

مباحثے میں وزیر خزانہ محمد اورنگزیب اور ان کے مصر، برازیل اور ترکیہ کے ہم منصب وزراء شریک ہوں گے۔

بیان کے مطابق یہ کانفرنس اُبھرتی ہوئی منڈیوں اور ترقی پذیر معیشتوں کی سوچ اور فکر کی بنیاد پر ایک مضبوط اور پائیدار عالمی معیشت کی تعمیر کے لیے ہر سال سعود عرب میں منعقد کی جائے گی۔

افتتاحی کانفرنس میں منتخب ملکوں کے وزرائے خزانہ، مرکزی بینکوں کے گورنرز اور پالیسی سازوں کے علاوہ تعلیمی اداروں، بین الاقوامی اداروں اور نجی شعبے کے ماہرین شرکت کر رہے ہیں۔

کانفرنس میں بدلتی دنیا میں استقلال کی تعمیر اور عالمی معاشی چیلنجوں سے نبردآزما ہونے کے لیے موزوں معاشی اور مالیاتی پالیسیوں پر بحث کی جائے گی۔

یہ کانفرنس ایسے وقت میں منعقد کی جا رہی ہے جب دنیا گہرے اور مسلسل اقتصادی جھٹکوں، تجارتی تناؤ، جغرافیائی سیاست اور تنگ مالی حالات سے نبرد آزما ہے۔

بیان میں مزید کہا گیا ہے کہ کانفرنس کی بدولت عالمی رہنماؤں کو ملکی، علاقائی اور عالمی اقتصادی حالات اور چیلنجوں کے حل کے لیے تبادلۂ خیال کے لیے منفرد پلیٹ فارم دستیاب ہو گا۔