روس اور امریکہ یوکرین جنگ کے خاتمے اور تعلقات بہتر بنانے کے لیے کام کرنے پر متفق

روس اور امریکہ نے یوکرین جنگ کے خاتمے اور اپنے سفارتی اور اقتصادی تعلقات کو بہتر بنانے کےلیے کام شروع کرنے پر اتفاق کیا ہے۔

امریکی وزیر خارجہ مارکو روبیو کا کہنا ہے فریقین نے تین مقاصد کے حصول کے لیے وسیع پیمانے پر اتفاق کیا، ان میں واشنگٹن اور ماسکو میں اپنے سفارتخانوں میں عملے کی بحالی، یوکرین امن مذاکرات کی سپورٹ کے لیے اعلی سطح کی کمیٹی کی تشکیل، قریبی تعلقات اور اقتصادی تعاون تلاش کرنا شامل ہیں۔

انہوں نے امریکہ اور روس مذاکرات کے لیے میزبانی کو سراہتے ہوئے مملکت کے کردار کو انتہائی اہم غیرمعمولی  قرار دیا۔

الاخباریہ کے مطابق روسی ہم منصب کے ساتھ مذاکراتی سیشن کے بعد امریکی وزیر خارجہ کا کہنا تھا ’پوتن اورٹرمپ کے مابین ملاقات کا کوئی وقت مقرر نہیں۔‘

انہوں نے اس یقین کا اظہار کیا کہ’ ریاض کی میزبانی میں ہونے والے مذاکرات یوکرین جنگ کے خاتمے کے لیے پہلا قدم ہوگا۔‘

انہوں نے مزید کہا ’ ٹرمپ کی جانب سے تمام فریقوں کے مفادات کے لیے یوکرین تنازعہ کو حل کرانے کے لیے کوشاں ہیں جن میں یورپ کے مفادات بھی شامل ہیں۔ تنازعات کے حل کےلیے لچک کا ہونا انتہائی اہم ہے۔‘

امریکی وزیر خارجہ کا کہنا تھا ’روس اور امریکہ میں سفارتی تعلقات کی بحالی کے لیے اتفاق کیا گیا ہے۔ یوکرین تنازع کے  حوالے سے اعلی سطح کی کمیٹی تشکیل دی گئی ہے۔

انہوں نے تنازعے کے خاتمے کے بعد روس کے ساتھ شراکت داری کے حوالے سے بھی تبادلہ خیال کے امکان ظاہر کیا۔

علاوہ ازیں روسی وزیر خارجہ سرگئی لاوروف نے تصدیق کی کہ مذاکرات میں دونوں ممالک کے مابین ایک معاہدہ ہوا ہےجس میں قومی مفادات کو ہرصورت میں مقدم رکھا گیا۔

انہوں نے واشنگٹن کے ساتھ بات چیت کو مفید قرار دیا جبکہ مذاکرات کے لیے مملکت کی جانب سے میزبانی کو سراہا، جس میں دونوں ممالک میں سفیروں کے تبادلہ پر اتفاق کیا جس سے فریقین کے سفارتی مشنز کی راہ میں حائل رکاوٹیں دور ہونے کی راہ ہموار ہوئی۔

انہوں نے مزید کہا ’پوتن اور ٹرمپ کے مابین ملاقات کے حوالے سے بھی حالات کو معمول پرلایا جارہا ہے۔‘

واضح رہے کہ سعودی عرب کے دارالحکومت ریاض میں یوکرین جنگ پر امریکی اور روسی حکام کے درمیان مذاکرات کا پہلا دور اختتام پذیر ہو گیا۔
العربیہ کے مطابق بند کمرے میں ہونے والے اس اجلاس کا پہلا دور کئی گھنٹے تک جاری رہا۔
مذاکرات میں امریکہ کی جانب سے وزیر خارجہ مارکو روبيو شریک ہوئے جبکہ روسی وزیر خارجہ سرگئی لاوروف نے اپنے ملک کی نمائندگی کی۔
سعودی وزیر خارجہ شہزادہ فیصل بن فرحان اور وزیر مملکت مساعد العيبان نے بھی ان مذاکرات میں شرکت کی۔
قبل ازیں سعودی عرب کی وزارت خارجہ نے بیان میں کہا ’سعودی عرب یوکرین جنگ پر روس اور امریکہ کے درمیان بات چیت کی میزبانی کر رہا ہے، جس کا مقصد عالمی امن اور سلامتی کی کوششوں کو آگے بڑھانا ہے۔‘
سعودی ولی عہد شہزادہ محمد بن سلمان کی ہدایت پر جاری کیے گئے بیان میں کہا گیا کہ ’آج سعودی عرب اس اہم موقع کا میزبان ہے جہاں ریاض میں روس اور امریکہ کے حکام کے درمیان مذاکرات ہو رہے ہیں۔‘