مسجد نبوی میں رمضان کے دوران یومیہ 300 ٹن آب زمزم کی فراہمی
مسجد کے مختلف مقامات پر موجود 18 ہزار کولرز میں زمزم بھرا جاتا ہے۔(فوٹو: ایس پی اے)
ماہ رمضان کے دوران مسجد نبوی میں روزانہ 300 ٹن آب زمزم مہیا کیا جاتا ہے جو مسجد کے مختلف مقامات پر موجود 18 ہزار کولرز میں بھرا جاتا ہے۔
ایس پی اے کے مطابق ادارہ امور حرمین کا کہنا ہے ’مسجد نبوی میں رمضان کے دوران دنیا بھر سے بڑی تعداد میں زائرین آتے ہیں۔‘
مسجد کی انتظامیہ کی جانب سے آب زم زم کی مستقل بنیادوں پر فراہمی کو یقینی بنانے کے لیے باقاعدہ ادارہ موجود ہے جہاں سیکڑوں کارکنان آب زم زم کی فراہمی کے لیے مامور ہیں۔
ادارے کی جانب سے کولرز کے علاوہ مسجد نبوی کے اندرونی مقامات اور روضہ شریفہ کی جانب زائرین کو آب زم زم کی چھوٹی بوتلیں بھی تقسیم کی جاتی ہیں۔
علاوہ ازیں کارکنوں کے ذریعے آب زم زم کے 60 متحرک یونٹس کی سہولت بھی موجود ہے جو معمر اور بیمار زائرین کو ان کی جگہ پرزم زم فراہم کرتے ہیں۔
