اردن کے فرمانروا کا دورہ ابوظبی، اماراتی صدر شیخ محمد بن زاید سے ملاقات

متحدہ عرب امارات کے صدر شیخ محمد بن زاید آل نہیان نے ابوظبی کے قصر البطین میں اردن کے فرمانروا شاہ عبداللہ ثانی کا خیر مقدم کیا ہے۔

ملاقات کے دوران دونوں ملکوں کے مضبوط تعلقات، تعاون اور انہیں مزید بڑھانے کے طریقوں پر تبادلہ خیال کیا گیا۔

وام کے مطابق صدرشیخ محمد بن زاید نے دونوں ممالک کے گہرے تاریخی تعلقات اور باہمی تعاون کو مزید مضبوط کرنے کی مشترکہ خواہش پر زور دیا۔

 خطے کی موجودہ صورتحال خصوصا غزہ میں فوری جنگ بندی کی کوششوں، انسانی امداد کی مسلسل فراہمی اور فلسطینی عوام کو ان کی زمین سے بے دخل کرنے کی کسی بھی کوشش کو مسترد کیے جانے  پر بات چیت کی گئی۔

دونوں رہنماؤں نے خطے میں استحکام کے فروغ اور تنازعات کے پھیلاؤ کو روکنے کی اہمیت پر زور دیا۔ 

یاد رہے اردن کے فرمانروا منگل کی شب ایک روزہ دورے پرامارات پہنچے تھے۔ دورے کے اختتام پر صدر شیخ محمد بن زاید اور دیگر اعلی حکام نے انہیں رخصت کیا۔