’احسان ‘ پلیٹ فارم پر ایک ارب 8 سو ملین ریال کے عطیات جمع
جمع ہونے والے عطیات مستحق افراد تک پہنچائے جاتے ہیں (فوٹو، ایکس)
قومی عطیہ پلیٹ فارم ’احسان‘ کے ذریعے عطیہ مہم کے پانچویں ایڈیشن میں ایک ارب 8 سو ملین ریال جمع کیے گئے۔
رمضان المبارک کے دوران 19 ملین سے زائد عطیات وصولی کی کارروائیاں ریکاڈ کی گئیں۔
اخبار 24 کے مطابق نیشنل چیرٹی پلیٹ فارم ’احسان‘ کے پانچویں ایڈیشن کا آغاز خادم حرمین شریفین شاہ سلمان بن عبدالعزیز آل سعود اور ولی عہد محمد بن سلمان بن عبدالعزیز آل سعود کی جانب سے 70 ملین ریال کے عطیہ سے کیا گیا تھا۔
مملکت کی اعلی قیادت کی جانب سے عطیہ مہم کے پانچویں ایڈیشن کو شروع کرتے ہی مملکت کے تمام شہروں سے لوگوں نے احسان پلیٹ فارم کے اکاونٹ میں عطیات ارسال کرنے کا آغاز کیا۔
رمضان المبارک کے دوران فطرانہ وصول کرنے کے لیے بھی الاحسان پلیٹ فارم پر سہولت فراہم کی گئی تھی جس کے ذریعے امسال 2.2 ملین ریال فطرانے کی مد میں جمع ہوئے ۔
واضح رہے حکومت کی جانب سے مستحق ضرورت مندوں تک عطیات و زکوۃ کی رقم پہنچانے کے لیے الاحسان پلیٹ فارم کے پانچویں ایڈیشن کو رمضان میں لانچ کیا گیا ۔
پلیٹ فارم کے ذریعے عطیات و زکوۃ کی وصولی کے لیے ڈیجیٹل ادائیگی سسٹم بھی جاری کیا گیا۔
پلیٹ فارم کے ذریعے جمع ہونے والی رقم حقیقی مستحق افراد تک پہنچائی جاتی ہے جس کے لیے سرکاری اداروں کی ٹیمیں ضرورت مندوں کے بارے میں مکمل معلومات حاصل کرکے ان کا اندراج کرتی ہیں بعدازاں انہیں عطیات ارسال کیے جاتے ہیں۔
