امارات: کیا گاڑی فروخت کرنے پر انشورنس پالیسی منتقل ہو سکتی ہے؟

اماراتی انشورنس فیڈریشن نے گاڑیوں کی انشورنس پالیسی منتقل یا باقی پریمیم ریفنڈ  کرنے کی مشروط منظوری دے دی۔ گاڑی فروخت کرنے کی صورت میں انشورنس پالیسی کی منتقلی اسی صورت میں ہو گی جب کوئ حادثہ ریکارڈ نہ ہو۔

امارات الیوم اخبار سے گفتگو کرتے ہوئے اعلی فنی کمیٹی کے سربراہ محمد مظھر حمادہ نے مزید بتایا کہ گاڑی فروخت کرنے کی صورت میں اگر خریدار باقی ماندہ پالیسی جاری رکھنے کا خواہش مند ہو تو وہ خریدار کے نام منتقل کی جا سکتی ہے تاہم اس کے لیے فریقین کا متفق ہونا ضروری ہے۔

گاڑی فروخت کرنے والے اگر پالیسی خریدار کو منتقل نہ کرنا چاہیں اس کے برعکس وہ پالیسی کی باقی رقم واپس لینا چاہیں تو اس کے لیے بھی لازمی ہے کہ کوئی ٹریفک حادثہ نہ ہوا ہو۔

ان  کا مزید کہنا تھا کہ حادثے کی صورت میں کمپنی کی جانب سے مطلوبہ کلیم ادا کیا جا چکا ہوتا ہے اس صورت میں نہ تو پالیسی منتقل ہوگی اور نہ ہی رقم واپس کی جائے گی کیونکہ کمپنی اس مد میں معاہدے کے مطابق گاڑی کی مرمت پر آنے والے اخراجات ادا کر چکی ہے۔

تھرڈ پارٹی انشورنس پالیسی کے حوالے سے ان کا کہنا تھا کہ حادثہ ریکارڈ نہ ہونے کی صورت میں تھرڈ پارٹی پالیسی کی منتقلی یا پریمیم کی باقی شدہ رقم کی واپسی اسی صورت میں ہو گی جب گاڑی فروخت کیے جانے کی رسید کمپنی میں جمع کرائی گئی ہو۔