سعوددی عرب کے کون سے ایئرپورٹس مارچ میں کارکردگی کے حوالے سے سرفہرست رہے

سعودی جنرل اتھارٹی آف سول ایوی ایشن (جی اے سی اے)  نے  مملکت کے انٹرنیشنل اور ڈومیسٹک ایئرپورٹس کی مارچ 2025 کی کارکردگی رپورٹ جاری کی ہے۔

سبق نیوز کے مطابق مارچ میں ریاض کے کنگ خالد انٹرنیشنل ایئرپورٹ، دمام کے کنگ فھد انٹرنیشنل ایئرپورٹ، جیزان کے کنگ عبداللہ بن عبدالعزیز انٹرنیشنل ایئرپورٹ، الاحساء انٹرنیشنل ایئرپورٹ اور القریات ایئرپورٹ نے اعلی پوزیشنیں حاصل کی ہیں۔

ایئرپورٹس کو پانچ کیٹگریز میں رکھا گیا ہے۔ انٹرنیشنل ایئرپورٹس کے پہلی کیٹگری سالانہ 15 ملین سے زیادہ مسافروں کی ہے اس میں ریاض کے کنگ خالد انٹرنیشنل ایئرپورٹ نے 82 فیصد کمٹمنٹ ریٹ کے ساتھ پہلی پوزیشن حاصل کی جبکہ جدہ کا کنگ عبدالعزیز انٹرنیشنل ایئرپورٹ 73 فیصد کارکردگی کے ساتھ دوسرے نمبر پر رہا۔

دوسری کیٹگری 5 سے 15 ملین سالانہ مسافروں کی ہے اس میں دمام  کا کنگ فہد انٹرنیشنل ایئرپورٹ 91 فیصد کارکردگی کے ساتھ سرفہرست جبکہ مدینہ منورہ کا امیر محمد بن بن عبدالعزیز انٹرنیشنل ایئرپورٹ 82 فیصد کارکردگی کے ساتھ  دوسرے نمبر پر رہا۔

 سالانہ 2 سے 5 ملین مسافروں کی تیسری کیٹگری میں جیزان  کے کنگ عبداللہ بن عبدالعزیز انٹرنیشنل ایئرپورٹ 100 کمٹمنٹ ریٹ کے ساتھ پہلے نمبر پر جبکہ ابھا انٹرنیشنل ایئرپورٹ  بھی 100 فیصد کارکردگی کے ساتھ دوسرے نمبر پر رہا۔ 

 چوتھی کیٹگری سالانہ 20 لاکھ سے کم مسافروں کی ہے اس میں الاحسا انٹرنیشنل ایئرپورٹ 100 فیصد  کارکردگی کے ساتھ سرفہرست رہا۔

ڈومیسٹک ایئرپورٹس کی پانچویں کیٹگری میں القریات ایئرپورٹ 100 فیصد کی  کارکردگی کی شرح کے ساتھ سرفہرست رہا۔

سول ایوی ایشن اتھارٹی نے ایئرپورٹس کی کارکردگی جانچنے کے لیے مختلف معیار مقرر کیے ہوئے  ہے جس میں مسافروں کے سفر کے مرحلے میں انتظار،  سامان کی بیلٹ پر آمد  کے علاوہ معذور افراد کے حوالے سے سہولتوں کا بھی جائزہ لیا جاتا ہے۔