ہند کسی بھی مہم جوئی سے باز رہے،ملیحہ لودھی

نیو یارک ..اقوام متحدہ میں پاکستان کی مستقل مندوب ملیحہ لودھی نے کشمیریوں کی جدوجہد آزادی کیلئے پاکستان کی بھرپور حمایت کااعادہ کرتے ہوئے کہاہے کہ مسئلہ کشمیر کا پرامن حل جنوبی ایشیا میں امن و استحکام کی ضمانت ہے۔ سرکاری خبر رساں ایجنسی کو انٹرویومیں انہوں نے کہاکہ پاکستانی عوام کشمیریوں کے منصفانہ نصب العین کی اخلاقی، سیاسی اور سفارتی حمایت کیلئے پرعزم ہیں۔انہوں نے کہا کہ کشمیرکا ہر دن ایک سیاہ دن ہے۔ 70 برس سے کشمیری عوام اقوام متحدہ کی قراردادوں پرعمل کے منتظرہیں۔ اقوام متحدہ کی قراردادیں امن کے قیام کا واحد راستہ ہیں۔انہوں نے کہاکہ ہند ایسی مہم جوئی سے بازرہے جو خطے میں امن کے لئے نقصان دہ ہے۔ پاکستان کسی بھی جارحیت کا منہ توڑ جواب دینے کے لئے تیار ہے۔کشمیر کی صورتحال سے توجہ ہٹانے کے لئے ہند ایل او سی کی خلاف ورزی کررہا ہے۔ انہوں نے مزید کہا کہ پاکستان سیاسی، سفارتی اور اخلاقی طورپرکشمیریوں کے حق خودارادیت کو سپورٹ کرتا رہے گا۔