ہندوستان کے حج کوٹے میں مزید اضافہ

ریاض...سعودی عرب نے ہندوستانی حجاج کے کوٹے میں مزید 5ہزار کا اضافہ کردیا۔ گزشتہ 2برسو ں کے دوران ہندوستان کے حج کوٹے میں40ہزار کا اضافہ کیا گیا۔ ہندوستانی وزیر اقلیتی امور مختار عباس نقوی نے ہندوستانی ذرائع ابلاغ سے گفتگو میں کہا کہ امسال پونے2 لاکھ ہندوستانی فریضہ حج کی سعادت حاصل کریں گے۔ گزشتہ برس ایک لاکھ 70ہزار ہندوستانیوں نے حج کیاتھا۔ گزشتہ 2برسوں کے دوران ہندوستانی حج کوٹے میں یہ تاریخی اضافہ ہے۔ نقوی نے حجاج اور معتمرین کیلئے سعودی حکومت کی مساعی اور حجاج کرام کو سہولتیں دینے پر خادم حرمین شریفین کا شکریہ ادا کیا۔2017ءمیں پہلا اضافہ 35ہزار کی صورت میں کیا گیا تھا اور اب 5ہزار کا اضافہ کیاگیا ۔ اس طرح مجموعی اضافہ40ہزار کا ہواہے ۔ سعودی عرب نے حال ہی میں ہندوستان سے سعود ی عرب حجاج کو سمندر کے راستے لانے کے لئے منظوری دیدی تھی۔23برس سے یہ سلسلہ معطل تھا۔