الباحہ.... محکمہ انسداد منشیات کی چھاپہ مار ٹیم نے منشیات فروشی کے خطرناک گروہ کو گرفتار کر لیا ۔ افریقیوں پر مشتمل گروہ کے قبضے سے بڑی مقدار میں چرس ، اسلحہ اور جعلی سعودی ریال برآمد ہوئے ۔ سبق نیوز کے مطابق ملزمان نے الباحہ کی پہاڑیوں میں اپنا اڈا قائم کیا ہواتھا ۔ محکمہ انسداد منشیات کو ملزمان کے بارے میں معلوم ہوا تو انکی تلاش شروع کر دی گئی ۔ محکمہ کے ریجنل ڈائریکٹر نے ملزمان کی گرفتاری کےلئے جامع حکمت عملی مرتب کی تاکہ گروہ کے تمام ارکان کو گرفتار کیا جائے ۔ چھاپا مار ٹیم نے ملزمان کی خفیہ طریقے سے نگرانی شروع کر دی ۔ ملزمان نے الباحہ کمشنری کے تھامہ کے پہاڑی سلسلے میں اپنا اڈا قائم کیا ہوا تھا ۔ ٹیم نے گروہ کی نگرانی کی اور اس وقت وہاں چھاپا مارا جب تمام ارکان اڈے پر موجود تھے ۔ ملزمان کے قبضے سے بڑی مقدار میں چرس ، جعلی سعودی ریال ،کلاشنکوف اور اضافی راﺅنڈ برآمدہوئے ۔ ملزمان کے خلاف رپورٹ درج کر کے انہیں متعلقہ ادارے کے سپرد کر دیا ۔ گروہ کے تمام ارکان غیر قانونی طور پر مملکت میں مقیم تھے ۔
