سمندری عقاب نے اپنے سے بڑے سائز کی ٹراوٹ پکڑ لی

ایشنگٹن، اسکاٹ لینڈ .... حادثاتی اور اتفاقی مواقع کی تصویر اتارنا اچھے اچھے پیشہ ور فوٹو گرافروں کیلئے بھی مشکل ہوتا ہے مگر یہاں ایک شوقیہ فوٹو گرافر نے ایک لاجواب تصویر اتار کر بہترین فوٹو گرافر کا ایوارڈ حاصل کرلیا ہے۔ انعام حاصل کرنے والے فوٹو گرافرکا نام بل ڈوہرٹی بتایا جارہا ہے۔ جس نے اسکاٹ لینڈ کے ایوی مور علاقے کی ایک چھوٹی جھیل کے قریب یہ انعام یافتہ تصویر اتاری جس میں ایک سمندری عقاب اپنے سے کہیں بڑے سائز کی ٹراوٹ کو نہ صرف پکڑنے میں کامیاب رہا بلکہ پکڑنے کے بعد اسے کئی بار پانی میں غوطے دیئے اور جب اسکی رہی سہی جان نکل گئی تواطمینان سے بیٹھ کر کھانے لگا۔ فوٹو گرافر ڈوہرٹی جو نارتھمبرلینڈ کا رہنے والا ہے اور اس کا کہناہے کہ وہ شوقیہ فوٹو گرافر ہے اور اپنے شوق کی تکمیل کیلئے وہ اکثر صبح سویرے اٹھ کر فوٹو گرافی کیلئے نکل جاتا ہے۔ یہ ایک معمول ہے اور اسی معمول نے اسے ایوارڈ یافتہ فوٹو گرافر بنادیا۔