احتیاطی تدابیر کی خلاف ورزی پر 71 مساجد بند

 سعودی عرب میں وزارت اسلامی امور نے کورونا کے پھیلاؤ کو روکنے کے لیے احتیاطی تدابیر کی خلاف ورزی پر 71 مساجد بند کردیں۔

 وزیر اسلامی امور و دعوت و رہنمائی ڈاکٹر عبداللطیف بن عبدالعزیز آل الشیخ نے کورونا وائرس سے بچاؤ کی تدابیر کی پابندی نہ کرنے والی مساجد سے متعلق سخت فیصلہ کیا ہے۔

ان مساجد میں وائرس سے بچاؤ کے اصولوں پر عمل نہ کرنے کے باعث کئی نمازی وائرس کا شکار ہو گئے تھے۔

عاجل ویب سائٹ کے مطابق آل الشیخ  نے اپنے ٹوئٹر اکاؤنٹ پر بتایا کہ بعض نمازیوں نے مساجد میں کورونا وائرس سے بچاؤ کے لیے مقرر صحت ضوابط کی پابندی نہیں کی تھی جس پر وہ وبا کا شکار ہو گئے۔ لہٰذا سعودی عرب کے مختلف علاقوں میں مجبوراً 71 مساجد بند کرنا پڑیں۔

بیان میں کہا گیا ہے کہ بند کی جانے والی مساجد کو سینیٹائز کیا جا رہا ہے۔

اس سے قبل وزارت داخلہ نے جدہ اور مکہ کی تمام مساجد ہفتے سے بند کرنے کا فیصلہ جاری کیا تھا۔ دونوں شہروں میں کورونا وائرس کے کیسز بڑھ جانے اور وائرس کی شدت میں اضافے کی وجہ سے لاک ڈاؤن بحال کرتے ہوئے مساجد میں جماعت اور جمعے کی نماز پر بھی پابندی لگا دی گئی تھی۔

مکہ میں مسجد الحرام بندش سے مستثنٰی ہے جہاں سکیورٹی فورس کے اہلکار اور مسجد الحرام کے مختلف اداروں کے کارکنان پانچوں وقت کی نمازیں جماعت سے ادا کر رہے ہیں۔ حرم مکی میں جمعے کی نماز بھی پابندی نہیں تاہم عام افراد کے داخلے پر پابندی برقرار ہے۔