انڈیا روس سے اربوں ڈالر کے 33 لڑاکا طیارے خریدے گا

انڈین حکومت نے 33 روسی لڑاکا طیارے خریدنے اور دیگر 59 طیاروں کو اپ گریڈ کرنے کی منظوری دی ہے۔

انڈیا ایک ایسے وقت میں اپنی ایئر فورس کو مضبوط بنانے کی کوشش کر رہا ہے جب اس کے چینی فوج کے ساتھ سرحد پر حالات کشیدہ ہے۔

خبر رساں ایجنسی روئٹرز کے مطابق انڈین وزارت دفاع نے کہا ہے کہ 21 مگ 29 طیاروں اور ایک درجن سوخوئے لڑاکا طیاروں کی لاگت دو ارب 43 لاکھ  ڈالرز ہے۔

وزیر دفاع کے مطابق ان طیاروں کی خریداری اور دیگر 59 مگ 29 طیاروں اپ گریڈیشن ایئرفورس کے فائٹر سکواڈرن میں اضافے کی ضرورت کو پورا کرنے کی ایک کوشش ہے۔'  

انڈیا اور چین کے درمیان کشیدگی گذشتہ ماہ اس وقت بڑھی جب دونوں ممالک کے فوجیوں کے درمیان لداخ کے علاقے میں جھڑپ ہوئی جس کے نتیجے میں 20 انڈین فوجی ہلاک بھی ہوئے۔

دونوں ممالک کے مابین ایک مختصر سی جنگ 1962 میں ہوئی تھی جس کے بعد حالیہ تصادم کی وجہ سے دونوں ممالک نے تین ہزار چار سو 88 کلو میٹر پر مشتمل لائن آف ایکچول کنٹرول پر اضافی فوجی تعینات کیے اور اہم مقامات پر فوجی سازوسامان بھی مہیا کیا گیا۔

حکام کے مطابق گذشتہ ماہ وزیر دفاع راج ناتھ سنگھ نے ماسکو کا دورہ کیا تھا جہاں انہوں نے جہازوں کی ترسیل میں تیزی لانے کا کہا تھا جس کے بعد جنگی طیاروں کی منظوری دی گئی تھی۔

انڈیا کی افواج کے زیر استعمال زیادہ تر اسلحہ روس سے خریدا گیا ہے جبکہ گزشتہ دس سالوں میں انڈیا نے اعلیٰ ہتھیاروں کی خریداری کے لیے امریکہ اور روس کا رخ کیا تھا۔

انڈین وزارت دفاع نے فضا سے فضا میں مار کرنے والے میزائلوں کی خریداری کی بھی منظوری دی ہے۔