مکہ، مدینہ سمیت کئی علاقے اتوار کو گرد آلود ہواوں کی زد میں

سعودی موسمیات کے قومی مرکز کا کہنا ہے کہ مملکت کے پانچ علاقوں میں اتوار 7 مارچ کو گرد آلود ہوائیں چلنے کا امکان ہے۔ 

ویب نیوز عاجل کے مطابق قومی مرکز نے ٹوئٹر پر بیان میں کہا کہ نجران ، عسیر ، الباحہ ، مکہ مکرمہ اور مدینہ منورہ کے بعض علاقوں میں اتوار موسم گردآلود رہے گا جس سے حد نگاہ بھی متاثرہوسکتی ہے۔ 

ان ریجنز میں ہونے والا گردوغبار کا سلسلہ مملکت کے مغربی حصوں کو بھی متاثر کرکے گا جبکہ ریاض اور مشرقی ریجن میں بھی گردآلود ہوائیں چلنے کا امکان ہے۔ 

موسمیات کے قومی مرکز  کا کہنا ہے کہ ریڈ سی میں ہوا شمال سے شمال مغربی سمت اور جنوب سے جنوب مشرقی سمت چلے گی جس کی رفتار 18 سے 45 کلو میٹرفی گھنٹہ ہوسکتی ہے جبکہ کھلے سمندر میں موجیں ایک سے ڈیرھ میٹر تک بلند ہوں گی۔ 

اس حوالے سے ماہرموسمیات عبدالعزیز الحصینی کا کہنا ہے کہ آئندہ ایک ہفتے تک موسم میں کسی خاص تبدیلی کی توقع نہیں بعض علاقوں میں گردوغبار رہنے کا امکان ہے۔