شاہ سلمان امدادی مرکز کا رمضان غذائی امدادی مہم میں اضافہ
شاہ سلمان امدادی مرکز کا رمضان غذائی امدادی مہم میں اضافہ
منگل 13 اپریل 2021 14:40
کنگ سلمان امدادی مرکزنے 59 ممالک میں 1536 امدادی منصوبے مکمل کیے ہیں (فوٹو: عرب نیوز)
شاہ سلمان ہیومینٹری ایڈ اینڈریلیف سینٹر(کے ایس ریلیف) نے یمن، البانیہ اور پاکستان و دیگر مسلم ممالک میں رمضان فوڈ پیکٹس کی تقسیم کے خصوصی منصوبوں کا آغاز کیا ہے۔
سعودی عرب کی سرکاری نیوز ایجنسی ایس پی اے کے مطابق ’امدادی مرکز کی جانب سے غذائی اشیا کے جو پیکٹ تقسیم کیے جا رہے ہیں وہ ایک مہینے تک پورے کنبے کی ضروریات پوری کر سکتے ہیں۔‘
مرکز کی جانب سے یمن کو سب سے زیادہ 3.47 ارب ڈالر کی امداد دی گئی ہے (فوڈو: عرب نیوز)
یمن میں شبوہ گورنریٹ کے ضلع عتق کے ایس ریلیف نے 750 بے گھر خاندانوں میں فوڈ پیکٹ تقسیم کیے ہیں۔ ان سے 3750 افراد مستفید ہوئے۔
مرکز نے عدن گورنریٹ کے مختلف ڈائریکٹوریٹس میں کھجوروں کے 43750 پیکٹ تقسیم کرنے کا منصوبہ بھی شروع کیا ہے۔
یمن کے عوام میں پانچ ہزار ٹن کھجوروں کی تقسیم سعودی منصوبے کا حصہ ہے۔
یمن کے وزیر برائے سماجی امور اور محنت ڈاکٹر محمد الزواری نے ملک بھرمیں سعودی مرکز کی انسان دوست کوششوں کی تعریف کی ہے۔
مزیدبرآں سعودی عرب یمن میں مختلف شعبوں میں انسانی ہمدردی کے کئی دوسرے منصوبوں پر کام کر رہا ہے۔
کے ایس ریلیف کے ذریعے مملکت نے فوڈ اینڈ ایگریکلچرل آرگنائزیشن کے تعاون سے 50 لاکھ ڈالر کی ہنگامی زرعی امداد بھی فراہم کی ہے۔
اس امداد کا مقصد یمن میں کورونا وائرس کی عالمی وبا کے اثرات کو کم کرنا ہے۔
انسانی خدمت میں تعاون سے متعلق اقوام متحدہ کے دفتر کی مدد سے سعودی مرکز 12 ملین ڈالر مالیت کے مختلف پروگراموں میں مدد دے رہا ہے۔
رواں سال فروری میں کے ایس ریلیف نے جنگ زدہ ملک میں غذائی تحفظ کو یقینی بنانے کے لیے ورلڈ فوڈ پروگرام کے ساتھ 40 ملین ڈالرکے معاہدے پر دستخط کیے تھے۔
فلسطینی عوام کے لیے مرکز کی جانب سے363 ملین ڈالرکی امداد دی گئی ہے (فوٹو: عرب نیوز)
اس کا مقصد یمن میں غذائی عدم تحفظ کے تجزیے کے لیے انضمام شدہ فوڈ سکیورٹی فیز کی درجہ بندی رپورٹ کے ساتھ مل کر یمنی عوام کی غذائی تحفظ اور ضروریات کو پورا کرنا ہے۔
معارب، تعز، عدن اور صنعا امداد وصول کرنے والے گورنریٹس میں شامل ہیں۔ یہ منصوبہ چھ ماہ کے اندر مکمل ہوجائے گا۔
علاوہ ازیں کے ایس امدادی مرکز نے البانیہ کے دارالحکومت ترانہ میں بیواؤں، یتیموں اور ضرورت مندوں میں 830 فوڈ باسکٹس تقسیم کی ہیں۔ اس امداد سے 4150 افراد مستفید ہوئے۔
دریں اثنا کنگ سلمان امدادی مرکز نے پاکستان کے صوبہ بلوچستان کے مختلف علاقوں میں رمضان فوڈ کے 2525 تھیلے تقسیم کیے۔ یہ امداد 15 ہزار150 افراد کی رمضان ضروریات پوری کر سکے گی۔
عدن میں کھجوروں کے 43 ہزار پیکٹ تقسیم کرنے کے منصوبے پر بھی عمل جاری ہے (فوٹو: عرب نیوز)
حالیہ رپورٹ کے مطابق یمن کو سب سے زیادہ 3.47 ارب ڈالر کی امداد دی گئی ہے۔ اس کے بعد فلسطین کا نمبر آتا ہے، جس کو 363 ملین ڈالرکی امداد دی گئی جبکہ شام کو 305 ملین ڈالراور صومالیہ کو 202 ملین ڈالر کی امداد فراہم کی گئی۔
واضح رہے کہ کنگ سلمان امدادی مرکزنے مئی 2015 میں اپنے قیام کے بعد سے اب تک 59 ممالک میں 5.5 بلین ڈالر کے 1536 امدادی منصوبے مکمل کیے ہیں۔
