12 ہزار روپے کا ریپڈ پی سی آر ٹیسٹ، امارت کے لیے پی آئی اے کی بکنگ بند

پاکستان انٹرنیشنل ایئر لائن (پی آئی اے) نے ریپڈ پی سی آر ٹیسٹ کی شرط عائد کیے جانے کے بعد 12 اگست تک متحدہ عرب امارات کے لیے بکنگ بند کر دی ہے۔

پی آئی اے کے ترجمان نے سنیچر کو اردو نیوز کو بتایا کہ ’امارات کی جانب سے روانگی سے چار گھنٹے پہلے ریپڈ پی سی آر ٹیسٹ کی شرط عائد کی گئی ہے اور فوری طور پر یہ سہولت پاکستان میں دستیاب نہیں ہے۔ اس وجہ سے بکنگ بند کی گئی ہے۔‘

ترجمان کا کہنا تھا کہ ’شارجہ اور العین کے لیے مخصوص ٹریول ایڈوائزی کے تحت بکنگ جاری رہے گی اور 11 اگست سے ابو ظہبی کی بکنگ بھی کھول دی جائے گی۔ تاہم دبئی کی بکنگ بعد میں اوپن ہوگی۔‘

دوسری جانب فلائی دبئی نے پاکستان میں ریپڈ پی سی آر ٹیسٹ کے لیے تین لیبارٹریز مختص کر دی ہیں۔ ان لیبارٹریز کا کہنا ہے کہ کل سے ریپڈ ٹیسٹ کی سہولت دستیاب ہوگی۔

فلائی دبئی کی جانب سے مسافروں کے لیے جاری نئے ہدایت نامے میں پاکستان سٹی لیب، ایڈوانسڈ لیب اور ڈاکٹر عیسیٰ لیبارٹری کو مختص کرتے ہوئے کہا کہ مسافر ان جگہوں سے ریپڈ پی سی آر ٹیسٹ کرا سکتے ہیں۔

اردو نیوز کے رابطہ کرنے پر سٹی لیب کراچی کی جانب سے بتایا گیا کہ ’ریپڈ پی سی آر کی سہولت آج سے کراچی میں اور کل سے پاکستان کے دیگر بڑے شہروں میں دستیاب ہو جائے گی۔‘

ایڈوانسڈ لیب اور ڈاکٹر عیسیٰ لیبارٹری کے ترجمانوں نے بتایا کہ ’کل سے ریپڈ ٹیسٹ کرنے کا سلسلہ شروع ہو جائے گا تاہم ڈاکٹر عیسیٰ لیبارٹری میں ابتدائی طور پر سہولت صرف کراچی میں ہی دستیاب ہوگی۔ ‘

ان لیبارٹریز کے مطابق ریپڈ پی سی آر کی فیس 6390 روپے وصول کی جائے گی۔

خیال رہے کہ ریپڈ پی سی آر کے ساتھ ساتھ مسافروں کو پی سی آر ریگولر کورونا ٹیسٹ کی منفی رپورٹ بھی ساتھ رکھنا ہوگی۔ یوں کورونا ٹیسٹ کی مد میں مسافروں کے 12 ہزار 780 روپے خرچ ہوں گے۔