امارات:کورونا ایس او پیز کی خلاف ورزی پر ایک ہزار سے 50 ہزار درہم جرمانہ

متحدہ عرب امارات کی حکومت نے کورونا وائرس کی موجودہ صورت حال کے پیش نظر ایس او پیز کی خلاف ورزی پر ایک ہزار سے 50 ہزار درہم تک جرمانہ عائد کرنے کا فیصلہ کیا ہے۔

ابوظبی میں پاکستانی سفارت خانے کی جانب سے پاکستانی کمیونٹی کو ان جرمانوں کے بارے میں آگاہ کر دیا گیا ہے۔

سفارت خانے کی ترجمان نے اردو نیوز کو بتایا کہ ’سفارت خانے نے اماراتی قوانین سے متعلق ہدایات اردو میں کمیونٹی کو پہنچا دی ہیں تاکہ وہ خلاف ورزیوں سے اجتناب کرتے ہوئے جرمانے سے بچ سکیں۔‘

سفارت خانے کے مطابق امارات کی جانب سے ان خلاف ورزیوں پر کم از کم ایک ہزار جب کہ زیادہ سے زیادہ 50 ہزار درہم جرمانہ کیا جا سکتا ہے۔

کورونا وائرس میں مبتلا ہونے کے باوجود ہسپتال میں داخل ہونے سے انکار، ڈاکٹر کی جانب سے تجویز کی گئی دوا لینے میں غفلت و انکار اور گھر پر قرنطینہ میں کوتاہی برتنے پر 50 ، 50 ہزار درہم جرمانہ عائد کیا جا سکتا ہے۔

اسی طرح قرنطینہ نہ کرنے، سفر کے بارے میں غلط معلومات فراہم کرنے اور بیرون ملک سے کارکن بھرتی کرکے لانے اور ان کی اطلاع متعلقہ حکام کو فراہم نہ کرنے پر 20 ہزار درہم جرمانہ ہوگا۔

کورونا مریضوں کے لیے بنائے گئے ای ٹریکنگ نظام کے ساتھ چھیڑ چھاڑ پر بھی جرمانے عائد کرنے کا فیصلہ کیا ہے۔ ای ٹریکر کو اپنے ساتھ لے جانے، خراب یا گم ہونے کی صورت میں کال سینٹر کو 24 گھنٹے کے اندر آگاہ نہ کرنے پر 10 ہزار درہم جرمانہ ہوگا جبکہ آلہ کھونے یا خراب کرنے پر الگ سے ایک ہزار درہم جرمانہ عائد کیا جائے گا۔

ڈیٹا کو تبدیل کرنے کی غرض سے ہیکنگ یا ٹریکر کو کھولنے پر بھی 20 ہزار درہم جرمانہ عائد کیا جائے گا۔

اس کے علاوہ دکانداروں، مالز اور مارکیٹوں کے لیے بنائے گئے ایس او پیز پر عمل در آمد نہ ہونے پر بھی متعدد جرمانے عائد کیے جائیں گے۔ تاہم حکومت نے بعض صورتوں میں ماسک اتارنے کی اجازت دی ہے جن میں ریستواران یا کیفے میں کھاتے پیتے، اکیلے دفتر میں کام کرتے، اکیلے ورزش کرتے، سانس میں مشکل اور جب طبی چیک اپ کے لیے ماسک اتارنا لازمی ہو شامل ہے۔

امارات کی حکومت نے شہریوں اور غیر ملکیوں کو ان جرمانوں کے خلاف اپیل کا حق بھی دیا ہے جو جرمانہ ہونے کی صورت میں پبلک پراسیکیوشن کی ویب سائٹ پر جا کر آن لائن درخواست دے سکتے ہیں۔