آئی ایس آئی چیف کابل میں، وی آئی پی اوورسیز، میسج کے بغیر دوسری کورونا ڈوز سمیت پاکستان سے گذشتہ ہفتے کی اہم خبریں
آئی ایس آئی چیف کابل میں، وی آئی پی اوورسیز، میسج کے بغیر دوسری کورونا ڈوز سمیت پاکستان سے گذشتہ ہفتے کی اہم خبریں
ہفتہ 11 ستمبر 2021 0:02
پاکستان کے حساس ادارے آئی ایس آئی کے سربراہ کابل پہنچ گئے ہیں۔ فائل فوٹو: ان سپلیش
گذشتہ ہفتے پاکستان میں افغانستان سے متعلق خبروں کے علاوہ حکومت اور اپورزیشن جماعتوں کے بیانات اور کورونا وبا سے بچاؤ کے لیے مزید اقدامات کا اعلانات ہوا۔ اس کے علاوہ پاکستان میں کیا ہوتا رہا، دیکھیے گذشتہ ہفتے کی چند اہم خبریں:
افغانستان سے پاکستانی روپے میں تجارت کے اثرات کیا ہوں گے؟
پاکستانی تاجروں نے حکومت کی جانب سے افغانستان کے ساتھ پاکستانی کرنسی میں تجارت کرنے کے فیصلے کو سراہا ہے اور کہا ہے کہ اس اقدام سے باہمی تجارت پر مثبت اثرات مرتب ہوں گے اور پاکستانی کی افغانستان کے لیے برآمدات میں اضافہ ہوگا۔
پاکستان میں کورونا وائرس کی صورت حال پر نظر رکھنے والے ادارے نیشنل کمانڈ اینڈ آپریشن سینٹر (این سی او سی) نے کورونا ویکسین کے حوالے سے نئی گائیڈ لائن جاری کی ہے۔
پاکستانی تاجروں نے حکومت کی جانب سے افغانستان کے ساتھ پاکستانی کرنسی میں تجارت کرنے کے فیصلے کو سراہا ہے۔ فائل فوٹو: ان سپلیش
سید علی گیلانی سرینگر میں انتقال کر گئے
کشمیر کے حریت پسند رہنما سید علی گیلانی بدھ کی رات سرینگر میں انتقال کر گئے تھے جس کے بعد حکام کی جانب سے لوگوں کو ان کے جنازے میں شرکت کی اجازت نہ دی گئی۔
اوورسیز پاکستانیوں کو وی وی آئی پی کا درجہ دلانے کے لیے حکومت کا پروٹوکول پر غور
پاکستان کی حکومت نے فیصلہ کیا ہے کہ اوورسیز پاکستانیوں کو وی وی آئی پی کا درجہ دلانے کے لیے وفاق کے اداروں میں خصوصی مالی اور غیر مالی مراعات اور پروٹوکول دیا جائے۔
پاکستان میں چھوٹی الیکٹرک گاڑیاں مارکیٹ میں کب دستیاب ہوں گی؟
پاکستان میں الیکٹرک وہیکل پالیسی کی منظوری کے بعد اب نجی کمپنیاں چھوٹی گاڑیوں کی لانچنگ کی بھی تیاری کر رہی ہیں۔ چینی کمپنی کی تیار کردہ چھوٹی 10 کے وی کی گاڑی نومبر میں مارکیٹ میں دستیاب ہوگی۔
پاکستان میں نجی کمپنیاں چھوٹی گاڑیوں کی لانچنگ کی بھی تیاری کر رہی ہیں۔ فائل فوٹو: اے ایف پی
چین سے ویکسین کی مزید 59 لاکھ خوراکیں پاکستان پہنچ گئیں
چین میں پی آئی اے کے کنٹری مینیجر قادر بخش سانگی نے بتایا کہ ’پیر اور منگل کو پی آئی اے کی دو سپیشل کارگو فلائٹس ویکسین کی 59 لاکھ خوراکیں لے کر اسلام آباد ایئرپورٹ پہنچیں۔‘
بلوچستان سے گرفتار 700 افغان پناہ گزین پاکستان سے بے دخل
پاکستان کے صوبہ بلوچستان میں انتظامیہ نے افغانستان سے آنے والے پناہ گزینوں کی گرفتاریاں شروع کردیں۔ حکام کے مطابق دو دنوں کے دوران 700 سے زائد افراد کو گرفتار کرکے واپس افغانستان بھیج دیا گیا۔
چین میں پی آئی اے کے کنٹری مینیجر نے بتایا کہ ’پی آئی اے کی کارگو فلائٹس ویکسین کی 59 لاکھ خوراکیں لے کر اسلام آباد پہنچیں۔‘ فائل فوٹو: اے پی پی
کوئٹہ میں احتجاج کرنے والے طلبہ پر پولیس کا لاٹھی چارج، متعدد زخمی
کوئٹہ میں میڈیکل کالجز کے انٹری ٹیسٹ میں مبینہ بے ضابطگیوں کے خلاف احتجاج کرنے والے طلبہ پر پولیس نے لاٹھی چارج کردیا جس سے کئی طلبہ زخمی ہوگئے۔ پولیس نے 20 سے زائد طلبہ کو گرفتار کرلیاہے۔
پاکستانی بحریہ کی امریکی اور جرمن بحریہ کے ساتھ مشق کا انعقاد
پاکستانی بحریہ کے جہاز پی این ایس عالمگیر نے شمالی بحیرہ عرب میں امریکی بحریہ کے جہاز شیلوہ اور جرمن بحریہ کے جہاز بائیرن کے ساتھ سہ ملکی بحری مشق میں شرکت کی۔
نور مقدم قتل کیس: ظاہر جعفر سمیت تمام ملزمان 23 ستمبر کو طلب
اسلام آباد کی سیشن عدالت نے نور مقدم قتل کیس میں مرکزی ملزم ظاہر جعفر سمیت تمام ملزمان کو 23 ستمبر کو طلب کر لیا ہے۔ عدالت نے آئندہ سماعت پر تھراپی ورکس کے چھ ملزمان کو عدالت کے سامنے پیش ہونے کا حکم دیا ہے۔
سی آئی اے کے سربراہ کی آرمی چیف جنرل قمر جاوید باجوہ سے ملاقات
پاکستان کی فوج کے شعبہ تعلقات عامہ (آئی ایس پی آر) کے مطابق امریکی انٹیلی جنس ایجنسی سی آئی اے کے سربراہ ولیم جوزف برنز کی آرمی چیف جنرل قمر جاوید باجوہ سے ملاقات ہوئی۔ ملاقات میں پاکستانی انٹیلیجنس ایجنسی کے سربرال لیفٹننٹ جنرل فیض حمید بھی موجود تھے۔
پاکستانی بحریہ کے جہاز نے امریکی بحریہ کے جہاز اور جرمن بحریہ کے جہاز کے ساتھ مشق میں شرکت کی۔ فائل فوٹو: اے ایف پی
جسٹس عائشہ ملک کی سپریم کورٹ میں تقرری نہ ہو سکی
چیف جسٹس پاکستان جسٹس گلزار احمد کی زیر صدارت جمعرات کو ہونے والے جوڈیشل کمیشن آف پاکستان کے اجلاس میں لاہور ہائی کورٹ کی جسٹس عائشہ ملک کی سپریم کورٹ میں تقرری کی منظوری نہ ہو سکی۔
بلاول حکومت اور اسٹیبلشمنٹ کے ساتھ بریکٹ ہوئے: فضل الرحمان
پاکستان ڈیموکریٹک موومنٹ کے سربراہ مولانا فضل الرحمان نے پی ڈی ایم ٹوٹنے کا ذمہ دار بلاول بھٹو زرداری کو قرار دیتے ہوئے کہا کہ جو پیشکش بلاول کو ہوئی وہ ہمیں بھی ہوئی لیکن ہم نے قبول نہیں کی۔
بائیومیٹرک تصدیق کے لیے اب بینک جانے کی ضرورت نہیں: نادرا
نیشنل ڈیٹابیس اینڈ رجسٹریشن اتھارٹی (نادرا) نے نئی سروس شروع کی ہے جس کے تحت اب آپ کو بائیو میٹرک کے لیے بینک جانے کی ضرورت نہیں اور آپ کو یہ سہولت موبائل فون پر مہیا ہوگی۔
سینیئر صحافی اور تجزیہ کار رحیم اللہ یوسف زئی انتقال کر گئے ہیں۔ جمعرات کی شام رحیم اللہ یوسف زئی کے بیٹے ارشد یوسف زئی نے فیس بک پوسٹ میں ان کی وفات کی تصدیق کی۔
جسٹس عائشہ ملک کی سپریم کورٹ میں تقرری کی منظوری نہ ہو سکی۔ فائل فوٹو: اے ایف پی
شرپسندوں کے داخلے کا خدشہ، کراچی کے متعدد داخلی راستے بند کر دیے گئے
کراچی کی انتظامیہ نے سکیورٹی خدشات اور شرپسندوں کے داخلے کے خدشے کے پیشِ نظر شہر کے نسبتاً کم استعمال ہونے والے داخلی راستوں کو بند کرنے کا فیصلہ کیا ہے۔
