سعودی ڈاکار ریلی کا افتتاح آج، 70 ممالک کے 650 ڈرائیورز شریک

سعودی ڈاکار ریلی 2022 ایڈیشن 44 کا افتتاح آج سنیچر کو ہوگا- یکم جنوری سے  14 جنوری تک 70 ملکوں کے  650 ڈرائیورز اپنی قسمت آزمائیں گے-

سبق ویب سائٹ کے مطابق سعودی عرب مسلسل تیسرے سال ڈاکار ریلی کی میزبانی کر رہا ہے-

یہ امتیاز اس لیے بھی حاصل ہے کیونکہ سعودی عرب وسیع و عریض صحراؤں، پرکشش قدرتی مناظر اور رنگا رنگ جغرافیائی تشکیل سے مالا مال ریاست ہے-

ڈاکار ریلی کو کامیاب اور پرکشش بنانے میں یہ ساری خوبیاں بے حد اہم ہیں-

ڈاکار ریلی کا افتتاح سعودی عرب کے مشہور شہر حائل سے ہوگا- باقاعدہ مقابلے کا آغاز اتوار کو ہوگا-

سپورٹس کی دنیا کے اس عظیم الشان پروگرام کی تیاریاں نقطہ عروج کو پہنچ چکی ہیں- اس کی شروعات حائل کے صحرا سے ہوگی اور اختتام  14 جنوری کو جدہ میں ہوگا- 8 جنوری کو دارالحکومت ریاض میں آرام کا وقفہ رکھا گیا ہے-

ڈاکار ریلی ایڈیشن  44 تاریخ کا سب سے بڑا مقابلہ ہے- اس میں 650 سے زیادہ ڈرائیور شرکت کررہے ہیں- ان کا تعلق دنیا کے  70 ممالک سے ہے- علاوہ ازیں ریلی میں مختلف زمروں کی 430 گاڑیاں شریک ہوں گی- 146 ڈاکار کلاسک زمرے میں شامل ہوں گی-

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں