ریاض میں مطلع گرد آلود، جدہ میں جمعہ کو غبار کے طوفان کا امکان

محکمہ موسمیات کے مطابق آج جمعرات کو ریاض ریجن سمیت متعدد علاقوں میں مطلع غبار آلود رہے گا۔

سبق ویب سائٹ کے مطابق محکمے نے کہا ہے کہ ’ریاض شہر کے علاوہ الزلفی، الغاط، شقرا، رماح اور المجمعہ میں شام 7 بجے تک حد نگاہ متاثر رہے گی‘۔

’اسی سے ملتی جلتی کیفیت حائل ریجن کی متعدد کمشنریوں میں بھی ہوگی جبکہ مشرقی ریجن کی الخفجی، القیصومہ، النعیریہ اور حفر الباطن میں بھی گرد چھائی رہے گی‘۔

مکہ مکرمہ ریجن کے متعلق محکمے نے پیشگوئی کی ہے کہ ’تیز ہوا چلے گی جس کے باعث الشعیبہ اور اللیث کے سمندر میں اونچی موجیں اٹھیں گی‘۔

ادھر طقس العرب ویب سائٹ نے کہا ہے کہ ’جمعے کے دن جدہ سمیت مکہ مکرمہ اور رابغ میں گرد و غبار کا طوفان ہوگا‘۔

سرد لہر کے بار میں محکمہ موسمیات نے کہا ہے کہ ’اللوز پہاڑ سمیت شمالی علاقوں میں برفباری کا سلسلہ جاری ہے جہاں سردی کی لہر کی شدت میں اضافہ ہوگا جبکہ مطلع غبار آلود ہوگا‘۔

دریں اثنا ماہر موسمیات ڈاکٹر عبد اللہ المسند نے کہا ہے کہ ’دو مختلف علاقوں سے آنے والی سرد لہر سعودی عرب کے مختلف علاقوں کو تین دن تک متاثر کرے گی‘۔

’اس کا آغاز آج جمعرات سے ہوگا جبکہ اس کا نکتہ عروج جمعے اور ہفتے کو ہوگا‘۔

انہوں نے کہا ہے کہ ’موسمیات نقشوں کا جائزہ لینے سے معلوم ہوتا ہے کہ آئندہ 5 دنوں تک بارش کی علامات نہیں ہیں‘۔