امارات میں وزٹ یا سیاحتی ویزے کو اقامے میں کیسے تبدیل کریں؟

متحدہ عرب امارات کی حکومت نے سیاحتی اور وزٹ ویزے پر آنے والوں کو بڑی سہولت دینے کا اعلان کیا ہے۔

اب وزٹ یا سیاحتی ویزے اقامے میں تبدیل کرانے  کے لیے ویزا ہولڈر کا امارات سے باہر جانا ضروری نہیں ہے۔ وہ 550 درہم فیس ادا کرکے سیاحتی اور وزٹ ویزے کو اقامے میں تبدیل کراسکیں گے تاہم اس کی شرائط پوری کرنا ہوں گی۔ 

الامارات الیوم کے مطابق وزٹ ویزے یا سیاحتی ویزے کی میعاد ختم ہونے سے قبل غیرملکی کو ویزے کو اقامے میں تبدیل کرنے کی کارروائی کرنا ہوگی۔ ویزے کی میعاد ختم ہونے کے بعد قیام پرجرمانہ ہے لہذا کارروائی میعاد ختم ہونے سے قبل شروع کرنا ہوگی۔ 

اماراتی حکومت نے ویزوں پر آنے والے تارکین سے کہا ہے کہ وہ اس کی تفصیلات قومی شناخت، کسٹم اور سرحدی سیکیورٹی کے وفاقی ادارے کی گائیڈ بک سے حاصل کرسکتے ہیں۔

اماراتی حکومت نے بتایا کہ اضافی فیس سو درہم دے کر سیاحتی اور وزٹ ویزے کی خصوصی سہولت حاصل کی جاسکتی ہے۔ 

 اگر سیاحتی یا وزٹ ویزے پر آنے والے کسی شخص نے مقررہ مدت سے زیادہ قیام کیا تو ایسی صورت میں جرمانہ ہوگا۔ پہلے دن زائد از میعاد پر دو سو درہم اور پھر ہر دن کی تاخیر پر سو درہم جرمانہ عائد کیا جائے گا جبکہ امارات سے باہر جانے کے لیے سو درہم فیس اضافی ادا کرنا ہوگی۔