گاڑی کا ’استمارہ‘ گم یا چوری ہونے پر دوسرا کارڈ کیسے جاری ہوگا؟

سعودی عرب میں ادارہ ٹریفک پولیس نے کہا ہے کہ گاڑی کا ملکیتی کارڈ ’استمارہ ‘ گم یا چوری ہونے پر اس کی اطلاع کرانے کے بعد دوسرا جاری کرایا جا سکتا ہے۔ 

عاجل نیوز کے مطابق ادارہ ٹریفک پولیس سے ٹوئٹرپر دریافت کیا گیا تھا کہ ’گاڑی کا استمارہ چوری ہونے پر دوسرا کیسے جاری کرایا جائے‘ ۔ 

 ٹریفک پولیس کی جانب سے کہا گیا کہ’ دوسرا استمارہ جاری کرانے کے لیے مقررہ فیس ادا کی جائے۔ اگرگاڑی کے مالک کے ذمہ کسی قسم کے قابل ادائیگی چالان موجود ہوں تو انہیں ادا کیا جائے۔ بعدازاں متبادل استمارہ جاری کرانے کےلیے ٹریفک پولیس کے قریبی ادارے سے رجوع کیا جائے‘۔

واضح رہے ادارہ ٹریفک پولیس کی جانب سے گاڑی کے ملکیتی کارڈ استمارے پرایکسپائری تاریخ درج کرنے کا سلسلہ ختم کیاجاچکا ہے۔ اب صرف آن لائن ہی فیس ادا کرکے استمارہ کی تجدید کرائی جاتی ہے۔ استمارے کے حوالے سے تمام تفصیلات صارف کے ابشر اکاونٹ پرموجود ہوتی ہیں۔ 

ادارے کی جانب استمارہ ایکسپائرہونے سے کچھ عرصہ قبل صارف کے موبائل پرانتباہی پیغام ارسال کردیاجاتا ہے تاکہ استمارہ ایکسپائرہونے سے قبل اس کی تجدید کرالی جائے۔