دورہ سعودی عرب: وزیراعظم شہباز شریف مدینہ سے جدہ پہنچ گئے

سعودی عرب کے ولی عہد شہزادہ محمد بن سلمان بن عبدالعزیز کی دعوت پر وزیراعظم محمد شہباز شریف تین روزہ اعلیٰ سطح کے سرکاری دورے پر سعودی عرب میں ہیں۔

جمعے کو وزیراعظم آفس سے جاری ہونے والے بیان کے مطابق وزیراعظم شہباز شریف اپنے دورے کے دوسرے روز مدینہ سے جدہ پہنچ گئے ہیں۔

گورنر مکہ خالد بن فیصل آل سعود اور سعودی عرب کے قومی سلامتی کے مشیر ڈاکٹر مسعدبن محمد العیبان نے ہوائی اڈے پر وزیراعظم پاکستان کا استقبال کیا۔

وفد میں وفاقی وزرا بلاول بھٹو زرداری، مریم اورنگزیب، خواجہ آصف، خالد مقبول صدیقی، چوہدری سالک حسین اور سابق فاٹا کے علاقے سے رکن قومی اسمبلی محسن داوڑ بھی شامل ہیں۔

وزیراعظم نے مدینہ منورہ میں قیام کے دوران دو مرتبہ روزہ رسول پر حاضری دی اور ریاض الجنتہ میں نوافل ادا کیے۔

انہوں نے جمعتہ الوداع کی نماز مسجد نبوی میں ادا کی اور ملکی سلامتی، ترقی اور سماجی خوشحالی کے لیے دعائیں مانگیں۔

پاکستان کے سرکاری خبر رساں ادارے اے پی پی کے مطابق وزارت عظمیٰ کا منصب سنبھالنے کے بعد وزیراعظم کا یہ پہلا غیر ملکی دورہ ہے۔

پاکستان کے دفتر خارجہ کے مطابق دورے کے دوران وزیراعظم سعودی قیادت کے ساتھ ملاقاتوں میں اقتصادی، تجارتی اور سرمایہ کاری جیسے تعلقات کو فروغ دینے کے علاوہ سعودی عرب میں پاکستانی افرادی قوت کے لیے روزگار کے زیادہ سے زیادہ مواقع پیدا کرنے کے حوالے سے بات چیت کریں گے۔

فریقین باہمی دلچسپی کے امور خاص طور پر متعدد علاقائی اور بین الاقوامی ایشوز پر بھی تبادلہ خیال کریں گے۔

اس دوران وزیراعظم شہباز شریف عمرے کی سعادت بھی حاصل کریں گے۔

پاکستان اور سعودی عرب برادرانہ تعلقات سے جڑے ہوئے ہیں جو باہمی اعتماد اور افہام و تفہیم، قریبی تعاون اور ایک دوسرے کی حمایت کی لازوال روایت پر مبنی ہیں۔

پاکستان کے عوام خادمین حرمین الشریفین کو انتہائی عزت کی نگاہ سے دیکھتے ہیں۔

پاکستان کے دفتر خارجہ کے مطابق ’دونوں ممالک کی جانب سے مسلسل اعلیٰ سطح کے دورے ان خصوصی تعلقات کی اہم خوبی ہیں۔ وزیراعظم کے دورے سے دونوں ممالک کے درمیان کثیر جہتی تعلقات کو مزید گہرا بنانے اور باہمی تعاون اور دونوں ممالک کی شراکت داری کو مزید مضبوط بنانے کا ذریعہ بنے گا۔‘ 

خیال رہے کہ 16 اپریل کو سعودی ولی عہد شہزادہ محمد بن سلمان نے وزیراعظم شہباز شریف کو ٹیلیفون کیا اور وزارت عظمیٰ کا منصب سنبھالنے پر مبارک باد دی تھی۔

دوران گفتگو وزیراعظم شہباز شریف نے سعودی ولی عہد سے دو طرفہ تعلقات مزید مضبوط بنانے کے لیے مل کر کام کرنے کے عزم کا اظہار کیا تھا۔

وزیراعظم شہباز شریف نے کہا کہ پاکستان اور سعودی عرب کے مابین تعلقات کو مزید وسعت دیں گے، دونوں ممالک کے درمیان تاریخی اور برادرانہ تعلقات ہیں۔

اس رابطے کے حوالے سے وزیراعظم ہاؤس سے جاری اعلامیے کے مطابق سعودی ولی عہد نے وزیراعظم شہباز شریف کو جلد دورہ سعودی عرب کی دعوت دی تھی جبکہ وزیراعظم نے شہزادہ محمد بن سلمان کو دورہ پاکستان کی دعوت دی۔