’تقریر میں 2018 کے انتخابات کی بات کی تھی،‘ شاہ محمود کی وضاحت

پاکستان تحریک انصاف (پی ٹی آئی) کے نائب چیئرمین اور سابق وفاقی وزیر خارجہ شاہ محمود قریشی نے انکشاف کیا ہے کہ ان کے خلاف ان کی اپنی پارٹی پی ٹی آئی نے سازش کی ہے۔

صوبہ پنجاب کے شہر ملتان کے انتخابی حلقے پی پی 217 میں عوامی اجتماع سے خطاب کرتے ہوئے شاہ محمود قریشی نے کہا کہ ’میرے خلاف میری اپنی پارٹی نے سازش کی اور 2018 میں مجھے یہاں سے صوبائی اسمبلی کے ممبر سے ہروایا، کس نے؟ پی ٹی آئی نے۔‘

تاہم اردو نیوز کے نامہ نگار وسیم عباسی سے بات کرتے ہوئے شاہ محمود قریشی نے کہا کہ انہوں نے اپنی تقریر میں 2018 کے انتخابات کی بات کی تھی کہ ایک شخص نے پارٹی حلف کی خلاف ورزی کرتے ہوئے ان کے خلاف الیکشن لڑا اور پارٹی کے چند عناصر نے بھی اس کی سپورٹ کی تھی۔ 

’بعد میں وہ عناصر بھی بے نقاب ہوئے اور وہ شخص بھی اور وقت نے ثابت کیا کہ وہی لوگ غلط تھے۔‘

قبل ازیں اپنے خطاب میں قریشی کا کہنا تھا کہ ’برملا کہہ رہا ہوں اور خان کو بھی کہا ہے آج پنجاب کی یہ کیفیت نہ ہوتی اگر شاہ محمود یہاں سے ایم پی اے ہوتا۔ 217 والو جاگو، مجھے کیا فرق پڑا؟ میں تو وزیر خارجہ بن گیا، تمہیں فرق پڑا، ملتان کو فرق پڑا، جنوبی پنجاب کو فرق پڑا، اگر یہ آپ کا انداز نہیں ہے سوچنے کا گزر جائے گی 17 تاریخ، کوئی فرق نہیں پڑتا۔‘

شاہ محمود قریشی نے اپنے بیٹے زین قریشی کو حلقہ پی پی 217 میں تحریک انصاف کی طرف سے صوبائی اسمبلی کے ضمنی انتخابات لڑنے پر اٹھنے والے تحفظات پر کہا کہ ’کچھ جنگیں جیتنے کے علاوہ بھی لڑی جاتی ہیں۔‘

خیال رہے پنجاب اسمبلی کے 20 حلقوں پر ضمنی انتخابات 17 جولائی کو ہوں گے جس میں پی ٹی آئی اور پاکستان مسلم لیگ ن کے درمیان کانٹے دار مقابلے کی توقع کی جارہی ہے۔