عرب تیندوے کے ہاں مادہ بچوں کی پیدائش، امریکہ اور دیگر کا مثبت ردعمل

رائل کمیشن فار العلا نے عریبین تیندوے کے دو مادہ بچوں کی پیدائش کا اعلان کیا ہے جو دنیا کے سب سے زیادہ معدومیت کے خطرے سے دوچار جانوروں میں سے ایک ہیں۔

عرب نیوز کے مطابق رائل کمیشن فار العلا نے پرنس سعود الفیصل سینٹر فار وائلڈ لائف ریسرچ میں نوزائیدہ عریبین تیندوے کے بچوں کی ایک ویڈیو بھی ٹویٹ کی تھی جہاں وہ پیدا ہوئے تھے۔

دوسری جانب ریاض میں امریکی سفارت خانے نے ٹویٹر پر ایک پیغام میں رائل کمیشن فار العلا کی سب سے زیادہ معدومیت کے خطرے سے دوچار نسلوں میں سے ایک کے تحفظ کی کوششوں کی تعریف کی۔

امریکی سفارت خانے نے اپنے پیغام میں کہا کہ ’ہم عریبین تیندوے  کے دو مادہ بچوں کی پیدائش پر سعودی عرب کو مبارکباد  پیش کرتے ہیں۔ رائل کمیشن فار العلا سب سے زیادہ معدومیت کے خطرے سے دوچار جانوروں میں سے ایک کو بچانے کے لیے بہت اچھا کام کر رہا ہے۔‘

عریبین تیندوے کے دو مادہ بچوں کی پیدائش کی خبر کو جاپان، انڈیا، کینیڈا، یوکرین، امریکہ اور فرانس سمیت دنیا بھر میں جانوروں سے محبت کرنے والوں کی جانب سے ہزاروں مثبت ردعمل موصول ہوئے ہیں۔

عریبین تیندوے کے دو مادہ بچوں کے تحفظ کے لیے رائل کمیشن فار العلا کی حکمت عملی میں شاران نیچر ریزرو میں اس کی افزائش نسل کے پروگرام کی توسیع اور اس کے لیے 25 ملین ڈالر گلوبل فنڈ کا قیام جیسے انیشیٹوز شامل ہیں۔

عریبین تیندوے کا مسکن تاریخی طور پر ماحولیاتی لحاظ سے متنوع رہا ہے۔

رائل کمیشن فار العلا نے ٹویٹ کیا ’ ہم العلا میں عریبین تیندوے کو معدومیت کے خطرے سے بچانے، ماحولیاتی نظام کی بحالی اور اپنے سعودی گرین انیشیٹو اور سعودی وژن 2020 کے مقاصد کو پورا کرنے کے لیے کام کرتے ہیں۔‘

خیال کیا جاتا ہے کہ صرف مٹھی بھر یہ جانور پورے جزیرہ نما عرب میں زندہ رہ سکتے ہیں جو عمان کے دوہفر پہاڑوں میں آخری پناہ گاہ میں موجود ہیں۔

عریبین تیندوے کو انٹرنیشنل یونین فار کنزرویشن آف نیچر کی ریڈ لسٹ میں ’ معدومیت کے انتہائی خطرے سے دوچار‘ جانوروں کے طور پر درجہ بندی کی گئی ہے۔

سعودی عرب کے وزیر ثقافت شہزادہ بدر بن عبداللہ بن فرحان  اور رائل کمیشن فار العلا نے 2016 میں عریبین تیندوے کے تحفظ  کے لیے پینتھیرا کے ساتھ ایک معاہدے پر دستخط کیے جس کے تحت دس سالوں میں 20 ملین ڈالر کی سرمایہ کاری کے علاوہ اس کی آبادی کا عہد کیا۔

مملکت نے اس سال فروری میں پہلا عریبین تیندوے کا دن منایا۔ یہ موقع ہر سال 10 فروری کو منایا جائے گا تاکہ خطرے سے دوچار بڑی بلی کے بارے میں شعور اجاگر کیا جا سکے۔