بشیر چوہدری -اردو نیوز، اسلام آباد
پاکستان کی وزارت اوورسیز پاکستانیز نے ستمبر 2020 میں ملک کی پہلی امیگریشن اینڈ ویلفیئر پالیسی تیار کرکے اس وقت کے وزیراعظم عمران خان کو منظوری کے لیے بھجوائی تھی۔
پالیسی کا مقصد پاکستان سے ورکرز کی منظم، محفوظ اور باقاعدہ امیگریشن یقینی بنانا ہے۔ بیرون ملک مقیم پاکستانیوں بالخصوص ورکرز اور پاکستان میں ان کے خاندانوں کی فلاح و بہبود کے لیے بہتر خدمات کی فراہمی اور بیرون ملک مقیم پاکستانیوں کو ملک کی ترقی میں شامل کرنے اور واپس آنے والے پاکستانیوں کو معاشی و سماجی ترقی میں شامل کرنے کا معاون نظام تشکیل دینا ہے۔
مزید پڑھیں
مارچ 2022 میں بطور انچارج وزیر عمران خان نے ابتدائی مسودے کی منظوری دے کر کابینہ میں پیش کرنے کی ہدایت کی تھی۔ وزارت اوورسیز پاکستانی نے مسودہ کابینہ ڈویژن کو بھجوایا لیکن حکومت کی تبدیلی کے ساتھ ہی پالیسی کی منظوری کا عمل روک دیا گیا۔
وزارت اوورسیز پاکستانیز کے حکام نے بتایا ہے کہ موجودہ حکومت نے اس پالیسی میں کچھ تبدیلیاں کرنے اور اسے مزید بہتر بنانے کا فیصلہ کیا ہے۔ اب وہ تبدیلیاں کی جا رہی ہیں جبکہ اس سلسلے میں دیگر سٹیک ہولڈرز سے مشاورت بھی جا رہی ہے۔
اس پالیسی پر نظرثانی کا فیصلہ اس وجہ سے بھی کیا گیا ہے کہ اس پالیسی کی تشکیل کے لیے پہلا مسودہ 2008 میں قائم ہونے والی پیپلز پارٹی کی دور حکومت میں تیار کیا گیا تھا۔ وہ مسودہ تمام سٹیک ہولڈرز کو اپنی تجاویز شامل کرنے کے لیے بھیجا گیا تھا۔ مسلم لیگ ن کے دور میں بھی اس مسودے پر کام ہوتا رہا تاہم اسے حتمی شکل نہ دی جا سکی۔
تحریک انصاف کی حکومت نے 2018 میں سٹیک ہولڈرز سے مشاورت کا سلسلہ شروع کیا اور بالاآخر پالیسی تیار کر لی گئی لیکن حتمی منظوری نہ لے سکی۔
اس حوالے سے وفاقی وزیر برائے اوورسیز پاکستانیز ساجد حسین طوری نے اردو نیوز کو بتایا کہ سابق حکومت کا سارا زور اوورسیز پاکستانیوں کو ووٹ کا حق دینے پر مرکوز تھا لیکن وہ اس کے لیے بھی کوئی میکانزم تیار نہ کر سکے۔ ہماری جماعت نے سب سے پہلے اس بات کی ضرورت محسوس کی تھی وہ پاکستانی جو نہ صرف اربوں ڈالر ترسیلات زر پاکستان بھیجتے ہیں بلکہ پاکستان کے حقیقی سفیر بھی ہیں۔
انھوں نے کہا کہ ’ہماری وزارت کا کام صرف بیرون ملک مقیم پاکستانیوں کی فلاح و بہبود نہیں بلکہ پاکستان میں موجود افراد کو بیرون ملک باعزت روزگار کے مواقع فراہم کرنا بھی ہے اور اسی طرح بیرون ملک سے واپس آنے والے افراد کے ساتھ رابطہ استوار رکھتے ہوئے ان کی صلاحیتوں سے فائدہ اٹھانے کے لیے بھی اقدامات کرنا ہے۔‘
وفاقی وزیر کے مطابق ’گزشتہ ایک دہائی کے دوران پاکستان میں جتنے افراد مارکیٹ میں بسلسلہ روزگار شامل ہوئے اس کا نصف بیرون ملک بالخصوص مڈل ایسٹ گئے۔ کورونا کی وجہ سے اس رجحان میں کمی ضرور آئی لیکن ہم پر امید ہیں کہ اب مارکیٹ میں بہت سے نئے مواقع دستیاب ہوں گے اور ہم نئی پالیسی کے ذریعے ان مواقع کو مزید مفید بنانے کے لیے اقدامات کرنا چاہتے ہیں۔‘
اردو نیوز کو دستیاب سابق حکومت کی پالیسی کے مسودے میں پالیسی بنانے کی وجوہات، مقاصد اور چیلنجز شامل ہیں۔ پالیسی کے تحت امیگریشن قوانین میں تبدیلی سمیت اداروں میں بہتری کے اقدامات بھی تجویز کیے گئے ہیں۔
پالیسی میں بیرون ملک مقیم پاکستانی ورکرز کو درپیش اہم چیلنجز کی نشان دہی بھی کی گئی ہے۔ جس کے تحت پاکستانی ورکرز کی مشرق وسطیٰ میں ملازمتوں کے مواقع کی فراہمی کے تسلسل کے ساتھ ساتھ دیگر ممالک میں نئے مواقع کی تلاش جاری رکھنا ہے۔ بیرون ملک ورکرز کے حوالے سے دو طرفہ یاداشتوں پر عمل درآمد نہ ہونے کے باعث دو طرفہ معاہدوں کے امکانات محدود ہو جاتے ہیں۔
اس کے علاوہ ریکروٹمنٹ کے عمل میں ہونے والی زیادتیاں اور ورکرز کے حقوق کے راستے میں آجروں کے حوالے سے میزبان ملکوں کے ساتھ بات چیت بھی ایک مسئلہ ہے۔ بیرون ملک ورکرز کے ساتھ ملازمت کے معاہدے سے انحراف، تنخواہوں میں کمی اور کام میں تبدیلی جیسے مسائل بھی سامنے ہیں۔
پاکستانی ورکرز کے بچوں کو سکولوں میں داخلے، پاسپورٹ اور شناختی کارڈ کی تجدید میں درپیش مشکلات اور سفارتی خدمات کی غیر مناسب فراہمی کو بھی سامنے رکھا گیا ہے۔
