ریاض میں بازوں کی نیلامی کا تیسرا سیزن شروع

ریاض کے فالکن کلب کے تحت بازوں کی نیلامی کا تیسرا سیزن شروع ہوچکا ہے جو 15 نومبر تک جاری رہے گا۔

سبق ویب سائٹ کے مطابق پہلے دن ایک باز کی نیلامی ہوئی جس پر بولی آغاز 60 ہزار ریال سے ہوا اور قیمت بڑھ کر ایک لاکھ 66 ہزار ریال تک جا پہنچی۔

فالکن کلب کے ترجمان ولید الطویل نے کہا ہے کہ ’بازوں کی نیلامی کے دو سیزنوں کی کامیابی کے بعد تیسرا سیزن شروع کیا گیا ہے‘۔

’گزشتہ دو سیزنوں میں مجموعی طور پر 197 باز 18 ملین ریال میں فروخت ہوئے ہیں‘۔

’یہ اس بات کی نشانی ہے کہ سعودی عرب میں منعقد ہونے والے باز میلے اور نیلامیاں انتہائی کامیاب ہیں جن میں دنیا بھر سے لوگ شرکت کرتے ہیں‘۔

انہوں نے کہا ہے کہ ’باز کی نیلامی سے پہلے متعلقہ ٹی وی چینلز کے علاوہ ٹوئٹر پر کلب کے آفیشل اکاؤنٹ پر تفصیلات جاری کی جاتی ہیں‘۔

’باز خریدنے کے خواہش مند اس کے بارے میں تفصیلی معلومات حاصل کرسکتے ہیں‘۔