ڈانس کرنے پر اہلکار معطل، ’ان کی بھی نجی زندگی ہوتی ہے‘

صوبہ پنجاب کے شہر سرگودھا میں نجی محفل میں ڈانس کرنے والے ایک پولیس اہلکار کو ڈسٹرکٹ پولیس آفیسر (ڈی پی او) نے ملازمت سے معطل کر دیا ہے۔

سماجی رابطوں کی ویب سائٹ ٹوئٹر پر ایک ویڈیو وائرل ہے جس میں پنجاب پولیس کے ایک اہلکار کو نجی محفل میں رقاصاؤں کے ساتھ ڈانس کرتے ہوئے دیکھا جا سکتا ہے۔

اطلاعات کے مطابق ڈی پی او سرگودھا نے پولیس اہلکار کو معطل کرنے کے ساتھ معاملے کی انکوائری اے ایس پی صدر کو کرنے کو حکم دیا ہے، جبکہ انکوائری آفیسر کو تین دن میں رپورٹ پیش کرنے کا کہا گیا ہے۔

نجی محفل میں ڈانس کرنے پر معطلی کا شکار ہونے والے پولیس اہلکار کی خبر پر ٹوئٹر صارفین کی جانب سے تبصرے بھی دیکھنے میں آ رہے ہیں۔

عدیل حمید نے کہا کہ ’تو کیا اب اہلکار اپنی نجی زندگی بھی ڈی پی او صاحبان سے پوچھ کر ان کی مرضی سے گزاریں گے؟ وہ آف ڈیوٹی تھا، وردی میں تو نہیں تھا۔‘

بُشی کہتی ہیں کہ ’پولیس والے کی بھی نجی زندگی ہوتی ہے، اب وہ انجوائے بھی نہ کرے؟‘

جون نامی صارف نے کہا کہ ’دراصل معطل کرنے کی وجہ ڈانس نہیں ہے، بے ہودا ڈانس ہے۔‘

راشدہ سیال کا کہنا تھا کہ ’یہ ڈانس تو بہت اچھا کر رہے ہیں، بہت اچھی ڈانس سکلز ہیں۔‘