یورپی یونین میں نئی سعودی سفیر ھیفا الجدیع کون ہیں؟ 

یورپی یونین میں نئی سعودی سفیر ھیفا بنت عبدالرحمٰن الجدیع نے منگل کو شاہ سلمان بن عبدالعزیز کے سامنے قصر یمامہ ریاض میں حلف اٹھایا۔

ھیفا بنت عبدالرحمٰن الجدیع کو یورپی یونین کے لیے سعودی عرب کے سفیر کے ساتھ ایٹمی توانائی کی یورپین سوسائٹی میں سعودی سفارتی مشن کا سربراہ تعینات کیا گیا ہے۔ 

ھیفا بنت عبدالرحمٰن الجدیع کولمبیا یونیورسٹی سے مذاکرات اور تنازعات کے موضوع پر ماسٹرز ہیں۔ وہ بین الاقوامی تعلقات پر بھی ماسٹرز ڈگری رکھتی ہیں جبکہ سراکوس یونیورسٹی سے جرنلزم میں گریجویشن بھی کر رکھی ہے۔

اپنی عملی زندگی کے آغاز میں بین الاقوامی تعلقات سٹریٹجک کمپنیوں اور رابطہ جات پر توجہ مرکوز کی۔ وزارت سیاحت اور وزارت خارجہ میں مشیر برائے بین الاقوامی تعلقات کے طور پر بھی کام کیا۔ 

ھیفا بنت عبدالرحمٰن الجدیع واشنگٹن میں سعودی سفارت خانے میں ہیڈ آف پبلک ڈپلومیسی کی حیثیت سے بھی فرائض نبھا چکی ہیں۔ انہوں نے نیویارک میں اقوام متحدہ میں کئی سال خدمات انجام دیں۔

یورپی یونین میں سفیر کے طور پر تعیناتی قبل سعودی ریسرچ اینڈ میڈیا گروپ میں (ایس آر ایم جی تھنک) میں ڈائریکٹر جنرل کے عہدے پر کام کر رہی تھیں۔ 

ایس آر ایم جی کی سی ای او جمانا الراشد نے ھیفا الجدیع کو سفیر تعینات کیے جانے پر مبارکباد دی اور کہا کہ ’ھیفا الجدیع نے ایس آر ایم جی تھنک کے قیام میں کلیدی کردارادا کیا اور محدود وقت میں بڑے کارنامے انجام دیے۔‘ 

ھیفا بنت عبدالرحمٰن الجدیع نے حلف اٹھانے کے بعد اپنے تاثرات میں کہا کہ ’یورپی یونین کے سفارتی مشن کی سربراہ اور سفیر کی حیثیت سے تعیناتی پر شاہ سلمان بن عبدالعزیز اور ولی عہد شہزادہ محمد بن سلمان کے اعتماد پر قیادت کی شکر گزار اور ممنون ہوں۔‘