’بابر نے ایک بار کہا تھا نواز تو میرا میچ ونز ہے‘

پاکستان اور نیوزی لینڈ کے درمیان دوسرا ون ڈے میچ کراچی کے نیشنل بینک ارینا میں جاری ہے اور اس میچ کے دوران پاکستانی آل راؤنڈر محمد نواز کا نواز ٹوئٹر پر ٹرینڈ کر رہا ہے جس کی وجہ ان کی بولنگ ہے۔

بدھ کو دونوں ٹیموں کے درمیان جب میچ شروع ہوا تو نیوزی لینڈ کی پہلی وکٹ نسیم شاہ کے پہلے ہی اوور میں صرف دو رنز پر گر گئی لیکن اس کے بعد ڈیون کونوے اور کپتان کین ولیمسن نے اچھی بیٹنگ کی اور ٹیم کا مجموعی سکور 183 رنز تک پہنچا دیا۔

ڈیون کونوے سینچری بنانے کے بعد نسیم شاہ کی ہے گیند پر بولڈ ہوئے لیکن اس وقت بھی نیوزی لینڈ کی بیٹنگ انتہائی مستحکم نظر آرہی تھی۔

لیکن پھر محمد نواز کی گیند کا جادو چلا اور صرف 23 رنز کے اندر نیوزی لینڈ کے چار مزید کھلاڑی پویلین لوٹ گئے۔

محمد نواز نے 10 اوورز میں 38 رنز دے کر چار وکٹیں حاصل کیں۔ ان کی بولنگ کا شکار بننے والے کھلاڑیوں میں کپتان کین ولیمسن، ڈیرل مچل، ٹام لیتھم اور گلین فلپس شامل تھے۔

محمد نواز کی شاندار بولنگ کارکردگی پر سوشل میڈیا صارفین انہیں کھل کر داد دیتے ہوئے نظر آرہے ہیں۔

عرفہ فیروز نے ایک ٹویٹ میں لکھا ’وائٹ بال کرکٹ میں محمد نواز اور شاداب خان کا کوئی متبادل نہیں ہے۔ پاکستان کی خوش قستی ہے کہ اس کے پاس دو ایسے آل راؤنڈر موجود ہیں جو بیٹنگ، بولنگ اور فیلڈنگ کی شاندار صلاحیتیں رکھتے ہیں۔‘

انڈیا کے خلاف ٹی20 ورلڈ کپ میں محمد نواز نے آخری اوور کیا تھا اور انڈیا یہ میچ جیت گیا تھا جس کے بعد پاکستانی آل راؤنڈر کو تنقید کا سامنا بھی کرنا پڑا تھا۔

محمد نواز میچ کے بعد پریشان نظر آئے تھے جس پر کپتان بابر اعظم نے انہیں پریشان نہ ہونے کا مشورہ دیا تھا اور ان کے کہے ہوئے مزید الفاظ اب بھی سوشل میڈیا صارفین کو یاد ہیں۔

رواحا قریشی نے محمد نواز کی تعریف کر تے ہوئے لکھا ’میرے کپتان نے ایک بار کہا تھا نواز تو میرا میچ ونز ہے اور اب آپ سب دیکھ سکتے ہیں۔‘

پاکستان کے سابق آلراؤنڈر یاسر عرفات نے ایک ٹویٹ میں لکھا ’ہر کپتان اپنی ٹیم میں ایک محمد نواز کی موجودگی چاہے گا۔ عمدہ بولر، اچھا بیٹر اور فیلڈ بھی کرسکتا ہے۔

پاکستان کی جانب سے نسیم شاہ نے تین اور حارث رؤف اور اُسامہ میر نے ایک، ایک وکٹ حاصل کی۔

پاکستان کو جیتنے کے لیے نیوزی لینڈ نے 262 رنز کا ہدف دیا ہے۔