ریاض میں 'لیالی الدرعیہ' نے شائقین کو متوجہ کر لیا

ریاض کے تاریخی علاقے الدرعیہ میں موسیقی، آرٹ اور مزے مزے کے منفرد کھانوں کے شائقین کو مقامی اور بین الاقوامی اعلیٰ درجے کے مراکز کے ساتھ  لیالی الدرعیہ( درعیہ نائٹس) ایونٹ اپنی جانب متوجہ کر رہا ہے۔

عرب نیوز کے مطابق الدرعیہ سیزن کا دوسرا ایڈیشن 22 فروری تک جاری رہے گا، تمام عمر کے زائرین کے لیے وسیع پیمانے پر مختلف قسم کی دلچسپیاں اور سرگرمیاں پیش کر رہا ہے۔

لیالی الدرعیہ میں عرب دنیا کے نامور ستاروں کی فنکارانہ پرفارمنس اور لائیو میوزک بھی پیش کیا جا رہا ہے۔

لیالی الدرعیہ میں موجود منیرہ محمد نے بتایا ہے کہ مجھے یہ ماحول بہت اچھا لگا ہے اور ابھی میں نے ایک سٹور سے یہ عبایہ خریدا ہے اور اب میں یہاں دوبارہ آنے کا بھی سوچ رہی ہوں۔

یہاں موجود ایک اور زائر خاتون خلود القرنی نے بتایا کہ مجھے یہاں پر مشرقی موسیقی کے ساتھ  فنکاروں کی صلاحیتوں نے متاثر کیا ہے۔

خلود نے مزید کہا کہ میں ریاض سیزن کے حوالے سے کئی زون کی سیر کر چکی ہوں لیکن اس جگہ کا خاص ماحول ہے جو مجھے بے حد پسند آیا ہے۔

انہوں نے بتایا کہ یہاں مقامی سعودی برانڈز ہیں جس میں خوبصورت اور نایاب زیورات ہیں جو بین الاقوامی برانڈز کا مقابلہ کر سکتے ہیں۔ میں نے نئے سال کا تحفہ خریدنا تھا اور خوشی ہوئی کہ یہاں سے مل گیا۔

یہاں پر ایک اور مقامی سٹور ہے جہاں گولڈ پلیٹڈ اور نایاب پتھروں سے مزین زیورات کے علاوہ لیدر مصنوعات بھی دستیاب ہیں۔

لیالی الدرعیہ میں ایک برانڈ شاپ پر سیلزگرل منال ابراہیم نے بتایا کہ ہم دوسری بار اس شاندار ایونٹ میں شامل ہوئے ہیں۔

ایک مقامی آڈیو کمپنی موسیقی کی شاموں کی میزبانی کر رہی ہے۔ مختلف پروگراموں میں شرکت کرنے والے فنکاروں کے ناموں اور تاریخوں کا اعلان بھی جلد کیا جائے گا۔

لیالی الدرعیہ میں مختلف تقریبات میں شمولیت کے لیے ویب سائٹ https://diriyahseason.sa/ar پر ٹکٹ دستیاب ہیں۔

الدرعیہ میں دیگر دلچسپ مقابلوں میں11جنوری سے 15 جنوری تک فٹبال کے مقابلوں میں ہسپانوی سپر کے تحت ریال میڈرڈ، بارسلونا، ویلنسیا اور ریئل بیٹس ایک دوسرے کے مدمقابل ہوں گے۔ اس کے بعد 18جنوری کو اطالوی سپر کپ(ای اے سپورٹس سپرکپ) کے تحت اے سی میلان اور انٹرمیلان کی ٹیموں کا مقابلہ ہوگا۔

فوٹوز: بشکریہ عرب نیوز

• خود کو اپ ڈیٹ رکھیں، واٹس ایپ گروپ جوائن کریں