رضوان کی 36 گھنٹوں میں دو نصف سینچریاں، ’ایسا لگتا ہے جیسے سپر ہیومن ہو‘

پاکستان کے مایہ ناز وکٹ کیپر بیٹر محمد رضوان کے لیے رواں ہفتہ کافی اچھا رہا اور انہوں نے دو مختلف فارمیٹس میں دو نصف سنیچریاں بنائیں۔ ان میں سے ایک نصف سینچری ٹیسٹ جبکہ دوسری ٹی20 میں بنائی گئی۔

کرکٹ ویب سائٹ وزڈن کے مطابق محمد رضوان نے یہ نصف سینچریاں دو مختلف ٹیموں کے لیے دو مختلف براعظموں میں بنائی ہیں۔

محمد رضوان جو پاکستان اور سری لنکا کے درمیان کولمبو ٹیسٹ میں گراؤنڈ میں پانی پلاتے نظر آرہے تھے، انہیں سرفراز احمد کے دوران بیٹنگ زخمی ہونے کے بعد متبادل کھلاڑی کے طور پر کھلایا گیا۔

31 سالہ بیٹر نے بھی یہ موقعہ ضائع نہ کیا اور پاکستان کی پہلی اننگز میں پہاڑ جیسے سکور میں 50 رنز کا حصہ ڈالا اور ناٹ آؤٹ رہے۔ انہوں نے اپنی نصف سینچری کھیل کے چوتھے روز کے آغاز میں ہی مکمل کر لی اور شام تک نعمان علی اور نسیم شاہ نے سری لنکا کو 188 رنز پر ڈھیر کر کے سیریز پاکستان کے نام کر دی۔

محمد رضوان جو پہلے ہی گلوبل ٹی20 کینیڈا کے لیے وینکوور نائٹس سے معاہدہ کر چکے تھے، میچ ختم ہونے کے بعد سیدھے ایئرپورٹ گئے اور 14 ہزار کلومیٹر کا سفر طے کر کے ٹورنٹو سے ہوتے ہوئے بریمپٹن پہنچے۔

وہ جہاز سے تازہ دم اُترے اور سیدھے جا کر وینکوور نائٹس کی جانب سے میچ کھیلنے لگ گئے۔ رضوان نے بریمپٹن وولوز کے پہلے آؤٹ ہونے والے کھلاڑی کا کیچ بھی پکڑا۔

بریمپٹن وولوز کی بیٹنگ لائن لڑکھڑا گئی تھی اور مقررہ 20 اوورز میں نو وکٹوں کے نقصان پر صرف 129 رنز بنا سکی۔

اس کے بعد پاکستانی وکٹ کیپر بیٹر اپنی ٹیم کے لیے اوپن کرنے بھی آئے۔ محمد رضوان جن کی شہرت ٹی20 کرکٹ میں مسلسل رنز بنانے والے بیٹر کی ہے، اپنی شہرت کی لاج رکھی اور 42 گیندوں پر 52 رنز بنا کر اپنی ٹیم کو فتح سے ہمکنار کرایا۔

جیت کے بعد وینکوور نائٹس کے کپتان راسی وینڈر ڈوسن نے کہا کہ ’ایسا لگتا ہے جیسے رضوان سپر ہیومن ہو۔‘

’طیارے سے اُترے اور سیدھا میچ کھیلنے آگئے۔ وہ میچ شروع ہونے سے پہلے پہنچے اور سیدھے فیلڈ کی طرف بھاگے۔ (میرے لیے) بحیثیت کپتان ٹیم میں ایسے تجربہ کار شخص کا ہونا بہت ہی شاندار ہے۔‘