غسل کعبہ کی رسم بدھ کو، کن خوشبویات کا استعمال کیا جائے گا؟

مسجد الحرام مکہ مکرمہ میں غسل کعبہ کی رسم  بدھ 2 اگست 2023 (15 محرم 1445ھ) کو ادا کی جائے گی۔  

 شاہ سلمان بن عبدالعزیز کی نیابت نائب گورنر مکہ مکرمہ شہزادہ بدر بن سلطان کریں گے۔ 

سرکاری خبر رساں ایجنسی ایس پی اے کے مطابق مطابق غسل کعبہ کی رسم میں متعدد وزرا، اعلی عہدیدار،عوامی وفود اور زائرین شریک ہوں گے۔ 

غسل کعبہ کی رسم سعودی قائدین مملکت کے قیام کے وقت سےادا کررہے ہیں۔

بانی مملکت شاہ عبدالعزیز اپنے عہد میں غسل کعبہ کی رسم ادا کرتے تھے۔ ان کے بعد ان کے حکمراں بیٹے شاہ سلمان بن عبدالعزیز تک اس کی پابندی کررہے ہیں۔ 

غسل کعبہ کےلیے استعمال ہونے والی خوشبو اور اشیا

مسجد الحرام انتظامیہ کے ماتحت خوشبویات کا ادارہ خانہ کعبہ کو معطر کرنے کے لیے اعلی درجے کا عود، عرق گلاب اور بخور کا انتظام کرتا ہے۔ 

حرمین شریفین انتظامیہ نے غسل کعبہ کی رسم کی تفصیل بیان کرتے ہوئے کہا  کہ غسل کعبہ کی تیاری کے لیے 20 لٹر آب زمزم چاندی کے دس، دس لٹر کے دو برتنوں میں رکھا جاتا ہے۔ 

انتظامیہ کا کہنا ہے کہ’ دس لیٹر آب زمزم کے گیلن میں 549 ملی لٹر طائف کا عرق گلاب شامل کیا جاتا ہے‘۔

24 ملی اعلی درجے کا عطر گلاب اور 24 ملی خاص قسم کا عود بھی زمزم میں شامل کیا جاتا ہے۔ اس کے علاوہ تین ملی مشک بھی ڈالا جاتا ہے۔  

خانہ کعبہ کے فرش اور دیواروں کو معطر کرنے کی کارروائی سے قبل انہیں خوب اچھی طرح سے ملایا جاتا ہے۔ 

دس لٹر آب زمزم کا چاندی کا دوسرا گیلن خانہ کعبہ کے فرش پر انڈیل دیا جاتا ہے۔ خانہ کعبہ کی خوشبویات سے معطر پانچ لٹرآب زمزم سے خانہ کعبہ کے فرش کو صاف کیا جاتا ہے۔ 

غسل کعبہ سے قبل خانہ کعبہ کے اندرونی حصے کو اعلی درجے کے عود سے دھونی دی جاتی ہے۔ اس میں تقریبا نصف کلوعود استعمال ہوتا ہے۔ 

غسل کعبہ کا دوسرا مرحلہ سامان کی تیاری سے متعلق ہے۔ غسل کعبہ میں اعلی درجے کی کاٹن کا کپڑا استعمال ہوتا ہے۔

اس پر حرمین شریفین پریذیڈنسی کا لوگو لگا ہوتا ہے۔ کاٹن کے کپڑے سے خانہ کعبہ کی دیواروں اور ستونوں کی صفائی بھی کی جاتی ہے اور انہیں صاف بھی کیا جاتا ہے۔ 

کپڑے کو عود سے معطر پانی میں بھگو کر استعمال کیا جاتا ہے۔ 

حرمین شریفین انتظامیہ کا کہنا ہے کہ ’تیسرے  مرحلے میں خانہ کعبہ کے فرش، دیواروں اور ستونوں کو خشک کرنے سے تعلق رکھتا ہے‘۔ 

خشک کرنے والے آلات چاندی سے آراستہ ہوتے ہیں جو خانہ کعبہ کے اندر دھلائی کے لیے استعمال کیے جانے والے پانی کو خشک کرنے میں استعمال ہوتے ہیں۔