پاکستان افغانستان میچ: ’شاداب کو منکڈ نہ کرتے، نسیم کو غصہ نہ آتا، میچ نہ ہارتے‘

پاکستان اور افغانستان کے درمیان جاری تین ون ڈے میچوں کی سیریز کے دوسرے میچ میں کئی ڈرامائی موڑ آئے۔

کبھی پاکستان جیت کے قریب پہنچا تو کبھی فتح افغانستان کی جھولی میں گرتی نظر آئی  تاہم آخرکار پاکستان ایک وکٹ سے ایک گیند قبل ہی میچ اور سیریز دونوں جیت گیا۔

دوسرے ون ڈے کا سب سے دلچسپ موڑ جب 50 ویں اوور کی پہلی گیند پر آیا تو افغان بولر فضل حق فاروقی نے پاکستانی نان سٹرائیکر اینڈ پر کھڑے شاداب خان کو گیند کروانے سے پہلے رَن آؤٹ (منکڈ) کر دیا۔

اس کے بعد نسیم شاہ کے بلّے سے نکلے میچ وِننگ ’ایج‘ کے بعد اُن کے جشن کا لمحہ بھی قابلِ دید تھا جس نے کرکٹ شائقین کو گزشتہ برس کے ایشیا کپ کی یاد تازہ کروا دی۔

شاداب خان کے منکڈ کے حوالے سے براؤنی نے سماجی رابطوں کی ویب سائٹ ٹوئٹر پر مشہور بالی وُڈ فلم ’دھمال‘ کی مِیم کو شیئر کرتے ہوئے لکھا کہ ’شاداب کو منکڈ کر دیا؟ 

افغانستان: ہاں

نسیم شاہ: نہیں کرنا تھا۔‘
 

ٹوئٹر ہینڈل نامعلوم افراد مزاحیہ انداز میں 2022 کے ایشیا کپ کے پاک افغان میچ کا موازنہ اِس میچ سے کر کے کہتے ہیں کہ ’آصف کو گالی نہ دیتے، نسیم کو غصہ نہ آتا، میچ نہ ہارتے، شاداب کو منکڈ نہ کرتے، نسیم کو غصہ نہ آتا، میچ نہ ہارتے۔‘
 

گایو مارلِک نے اپنی ٹویٹ میں گزشتہ برس کے ایشیا کپ میں نسیم شاہ کے جشن کی ویڈیو پر بطور مِیم لکھا کہ ’اُس نے شاداب کو کیسے منکڈ کیا۔‘
 

محمد سروش ابراہیم لکھتے ہیں کہ ’11 کھلاڑیوں نے مل کر شاداب کو منکڈ کرنے کا پلان بنایا اور پھر بھی ہار گئے۔‘
 

ہینڈل پی ایس ایل مِیم والے نے ایک مِیم شیئر کی جس میں انہوں ںے انڈین کھلاڑی روی چندرن اَشوِن کی جانب سے فضل حق فاروقی کا مذاق اُڑاتے ہوئے لکھا کہ ’منکڈ کر کے بھی ہار گیا۔‘
 

آریہا فاطمہ آرائیں کہتی ہیں کہ ’ورلڈ کپ میں پاکستان اور انڈیا کے درمیان میچ میں کسی بھی ٹیم نے منکڈ کیا تو اُس کی وجہ سے میری جان نکل جائے گی۔‘
 

اسی سلسلے میں حجاب زاہد ٹوئٹر پر کہتی ہیں کہ ’نسیم شاہ کے اپنے جشن کو دوبارہ سے ویسا ہی منانے کا لمحہ میرا سب سے پسندیدہ تھا۔‘
 

کرکٹ کی ویب سائٹ ’کرک انفو‘ نے اپنی ٹویٹ میں لکھا کہ ’کیا یہ جہاز ہے؟ کیا یہ پرندہ ہے؟ نہیں یہ پختونخوا سے سپر ہیرو ہے۔ آج نسیم شاہ کے اعصاب لوہے کی مانند تھے۔‘
 

عائشہ سارہ کہتی ہیں کہ ’جب نسیم شاہ کھیل رہے ہوں تو کبھی بھی اپنا ٹی وی چھوڑ کر کہیں مت جائیں۔‘