ایشیا کپ: پاکستان اور انڈیا کے میچ کے لیے ’اضافی دن‘ رکھنے کا فیصلہ کر لیا گیا

ایشیا کپ کے اہم ترین پاکستان بمقابلہ انڈیا میچ کے لیے ریزرو ڈے رکھنے کا فیصلہ کر لیا گیا ہے۔

کرکٹ کی کوریج کرنے والی ویب سائٹ ’کرک انفو‘ کے مطابق 10 ستمبر کو ایشیا کپ کے سپرفور مرحلے میں کولمبو میں شیڈول پاکستان اور انڈیا کے درمیان میچ کے لیے اضافی دن رکھنے کا فیصلہ کر لیا گیا ہے۔

فائنل کے علاوہ یہ واحد میچ ہوگا جس کے لیے ریزور ڈے رکھا گیا ہے۔

دوسری جانب پاکستان کرکٹ بورڈ (پی سی بی) نے سماجی رابطوں کی ویب سائٹ ٹوئٹر پر ٹویٹ کے ذریعے تماشائیوں کو مشورہ دیا ہے کہ وہ میچ کے لیے ٹکٹ پاس ہی رکھیں کیونکہ اس کی میچ کے ریزرو ڈے کے لیے بھی ضرورت پڑ سکتی ہے۔
 

یاد رہے اس سے قبل دو ستمبر کو پاکستان اور انڈیا کے درمیان پالیکیلے میں کھیلا گیا میچ بارش کے باعث بغیر کسی نتیجے کے منسوخ کر دیا گیا تھا جبکہ اُس کے بعد پالیکیلے میں ہی انڈیا اور نیپال کے درمیان میچ بھی بارش سے متاثر ہوا تھا جس کے باعث انڈٰیا کو جیت کے لیے ڈک ورتھ لوئس کے قانون کے تحت ہدف دیا گیا تھا۔

دوسری جانب موسم کی خبروں کی ویب سائٹ ’ایکیو ویدر‘ کے مطابق 10 ستمبر کو کولمبو میں سارا دن بارش  ہونے کی پیش گوئی ہے۔

10 ستمبر کو کولمبو میں دن کے وقت تین گھٹنے بارش متوقع ہے جبکہ رات کے وقت بارش چھ گھنٹوں تک ہو سکتی ہے۔

اس کے علاوہ 10 ستمبر کو دوپہر کے وقت بھی بارش کی پیش گوئی ہے۔

اس ساری صورتحال کے بعد اس بات کا اندازہ لگایا جا رہا ہے کہ پاکستان اور انڈیا کے میچ کے حوالے سے دونوں ممالک کے عوام کو ایک مرتبہ پھر سے مایوسی کا سامنا کرنا پڑ سکتا ہے۔

صرف یہی میچ نہیں بلکہ کولمبو میں شیڈول سپرفور کے باقی میچ بھی بارش کے باعث متاثر ہو سکتے ہیں۔

اسی سلسلے میں اگر ایشیا کپ کے سپرفور مرحلے کے باقی میچ بارش کے باعث بے نتیجہ رہتے ہیں تو اِس صورتحال میں پاکستان فائنل میں پہنچ جائے گا جبکہ سری لنکا اور اںڈیا کے درمیان فائنل میں جانے کا فیصلہ ٹاس پر ہوگا۔

اسی طرح اگر ایشیا کپ کا فائنل میچ بھی بارش کے باعث بغیر کسی نتیجے کے ختم ہو جاتا ہے تو ٹرافی دونوں ٹیموں کے درمیان تقسیم کی جائے گی۔