حسن علی کے سسر انڈیا میں اپنی نواسی کو ملنے کے لیے بے تاب

انڈین ایکسپریس کے مطابق ہریانہ کے ضلع نوح سے تعلق رکھنے والے ریٹائرڈ بلاک ڈیلوپمنٹ آفیسر لیاقت خان کو 14 اکتوبر کو احمدآباد میں کھیلے جانے والے پاکستان اور انڈیا کے درمیان ورلڈ کپ کے میچ کا شدت سے انتظار ہے کیونکہ وہ اسی بہانے اپنی دو برس کی نواسی کو پہلی بار ملنا چاہتے ہیں۔

حسن علی کی اہلیہ سمیعہ خان کا تعلق انڈیا سے ہے۔ ان دونوں کی شادی 2019 میں ابو ظبی میں ہوئی تھی جس کے بعد سمیعہ خان ابھی تک انڈیا واپس نہیں گئیں۔

حسن علی کے سسر لیاقت خان کہتے ہیں کہ ’میری اہلیہ 2021 میں پاکستان گئی تھیں جب میری بیٹی کے ہاں بچی کی پیدائش متوقع تھی۔ مجھے امید ہے ہم احمدآباد میں ایک مرتبہ پھر سے ملیں گے۔ میں اپنی نواسی سے ملنے کو بے تاب ہوں۔‘

فاسٹ بولر کی ورلڈ کپ کے لیے قومی ٹیم میں سلیکشن بھی حادثاتی طور پر ہوئی ہے۔ حسن علی ورلڈ کپ کے لیے پاکستان ٹیم کا حصہ نہیں تھے تاہم ایشیا کپ میں نسیم شاہ کی انجری کے بعد انہیں سکواڈ میں شامل کیا گیا جس کے بعد اِن دونوں فیملیز کو ایک دوسرے سے ملنے کا موقع مل گیا ہے۔

لیاقت خان مزید کہتے ہیں کہ ’میں اپنی زندگی رُومی کے ایک قول پر گزارتا ہوں جو میں نے کالج کے دنوں میں پڑھا تھا کہ اپنے دل کی سنو، بِھیڑ کی نہیں۔ میری بیٹی ایمیریٹس ایئرلائن میں فلائٹ انجینیئر کے طور پر کام کرتی تھی جس کے بعد اُس کی حسن علی سے دبئی میں ملاقات ہوئی۔ سمیعہ نے حسن کے بارے میں مجھے بتایا، میں نے اُس کے فیصلے پر اعتماد کیا۔‘

اپنی بیٹی اور داماد کے باعث انڈیا پاکستان کے میچوں میں وہ کسے سپورٹ کرتے ہیں؟ اس بارے میں انہوں نے کہا کہ ’میں سنیل گواسکر، کپل دیو، سچن تندولکر، محمد اظہرالدین کو دیکھا ہے لیکن میں وراٹ کوہلی کا مداح ہوں۔ مجھے محبت ہے وراٹ کوہلی سے۔‘

63 برس کے ریٹائرڈ بیوروکریٹ نے مزید کہا کہ ’میرا نہیں خیال کے اس وقت وراٹ کوہلی سے کوئی بہتر کھلاڑی موجود ہے۔ ہاں اُن کی فارم میں کچھ کمی آئی تھی لیکن وہ دوبارہ سے فارم میں آگئے ہیں اور سب سے آگے ہیں۔ جب میں حسن سے ملوں گا تو میں اُس سے درخواست کروں گا کہ مجھے میری ٹیم (انڈیا) کے کھلاڑیوں سے بھی ملوائے۔ میں وراٹ کوہلی کے ساتھ فوٹو بنوانا چاہتا ہوں اور راہُل ڈراوڈ کو سلام کہنا چاہتا ہوں۔‘

لیاقت خان کہتے ہیں کہ کوئی ایسا دن نہیں ہوتا جس دن وہ انڈیا اور پاکستان کے درمیان اچھے تعلقات کے لیے دعا نہیں کرتے۔

وہ کہتے ہیں کہ ’میری اللہ سے یہ ہی گزارش ہے کہ دونوں ملکوں کے رشتے سدھر جائیں۔‘

انہوں نے پاکستان اور انڈیا کے درمیان باہمی سیریز ہونے کی تمنا کرتے ہوئے کہا کہ ’میں چاہتا ہوں کہ انڈیا اور پاکستان کے درمیان مزید کرکٹ ہو۔ امید ہے حسن کبھی دہلی میں کھیلیں گے اور ہم اپنے گھر پر اُس کی میزبانی کر پائیں گے اور میری بیٹی اپنے گھر آ کر رہ پائے گی۔ ایک والد کی تو بس یہ ہی خواہش ہے۔‘