ایشوریا رائے سے متعلق عبدالرزاق کی ’غیرمہذب‘ گفتگو، ٹوئٹر صارفین شدید برہم

پاکستان کے سابق کرکٹر عبدالرزاق کی جانب سے ایک پروگرام میں بالی وُڈ کی اداکارہ ایشوریا رائے کے بارے میں گفتگو کو انٹرنیٹ صارفین نے انتہائی غیرمہذب قرار دیتے ہوئے اُن پر شدید تنقید اور برہمی کا اظہار کیا ہے۔

سوشل میڈیا پر وائرل ویڈیو میں عبدالرزاق کو پاکستان کے سابق کرکٹرز عمر گل، سعید اجمل اور شاہد آفریدی کے ساتھ ایک تقریب میں بیٹھا دیکھا جا سکتا ہے جس میں وہ اپنی گفتگو میں ہندی فلموں کی سپرسٹار اداکارہ ایشوریا رائےکا نام لیتے ہوئے نازیبا مثال دیتے ہیں۔

ویڈیو میں یہ بھی دیکھا جا سکتا ہے کہ عبدالرزاق جب اداکارہ کے بارے میں یہ گفتگو کرتے ہیں تو اُن کے ساتھ شاہد آفریدی اور عمر گل بھی تالیاں بجا کر ہنستے ہوئے دکھائی دیتے ہیں۔

اس بارے میں سماجی رابطوں کی ویب سائٹ ایکس (ٹوئٹر) پر باسط سبحانی لکھتے ہیں کہ ’یہ کتنی غیراخلاقی بات ہے۔ اسی وجہ سے تعلیم اور شعور بہت اہم ہے۔ اِن تینوں (عمر گل، شاہد آفریدی اور عبدالرزاق) نے دنیا گھومی ہے اور اس ے باجود عبدالرزاق نے ایسی بات کی جس کا ساتھ عمر گل اور شاہد آفریدی نے بھی دیا۔ اس سے ایشوریا، اُن کی پیاری بچن فیملی اور دنیا بھر میں اُن کے لاکھوں مداحوں کو دکھ پہنچے گا۔ شدید قابلِ مذمت۔‘
 

نایاب چشتی نے تبصرہ کرتے ہوئے لکھا کہ ’مجھے یقین نہیں آ رہا کہ عبدالرزاق نے ایشوریا رائے کے بارے میں ایسی توہین آمیز گفتگو کی ہے۔ یہ بالکل بھی قابل قبول نہیں ہے اور مزید غلط بات یہ ہے کہ اس پر شاہد آفریدی اور عمر گل ہنس رہے تھے۔‘

’عبدالرزاق کو اپنے الفاظ پر معافی مانگنی چاہیے۔‘
 

وجاہت کاظمی اپنے تبصرے میں لکھتے ہیں کہ ’عبدالرزاق کی ایشوریا رائے کے بارے میں غیر مہذب گفتگو بہت ہی بھیانک تھی۔ اس پر مزید افسوس کی بات یہ تھی کہ شاہد آفریدی اور عمر گل کو یہ بات مزاحیہ لگی۔ یہ رویہ بالکل بھی قابلِ قبول نہیں ہے۔‘