’ایسا لگ رہا ہے آسٹریلین ٹیم قبرستان میں جشن منا رہی ہے، اتنی خاموشی‘

آئی سی سی کرکٹ ورلڈ کپ کے فائنل میں آسٹریلیا نے انڈیا کو 6 وکٹوں سے شکست دے کر چھٹی مرتبہ ورلڈ کپ اپنے نام کر لیا ہے۔

آسٹریلیا نے احمد آباد میں کھیلے گئے ورلڈ کپ فائنل میں انڈیا کی جانب سے دیے گئے 241 رنز کے ہدف کو بآسانی 43 ویں اوورز میں حاصل کر لیا۔

آسٹریلیا کی جانب سے فائنل میں ٹریوس ہیڈ نے ناقابلِ شکست 137 رنز بنائے اور اپنی ٹیم کو ورلڈ چیمپیئن بنوا دیا۔

انڈیا اس فائنل سے قبل اس ٹورنامنٹ میں ناقابلِ تسخیر تھا اور انڈین ٹیم کو اِس ورلڈ کپ کی سب سے مضبوط ٹیم تصور کیا جا رہا تھا تاہم آسٹریلیا نے روہت شرما کی ٹیم کی امید پر پانی پھیر دیا۔

انڈیا کی آئی سی سی کرکٹ ورلڈ کپ کے فائنل میں شکست پر صارفین کے دلچسپ  تبصرے دیکھنے میں آ رہے ہیں۔

پاکستان کے نگراں وزیراعظم انوار الحق کاکڑ نے اپنی ٹویٹ میں لکھا کہ ’میں آسٹریلیا کو ورلڈ کپ 2023 جیتنے پر مبارک باد پیش کرتا ہوں۔ ٹریوس ہیڈ کی شاندار اننگز۔ ٹیم انڈیا آپ بھی اچھے کھیلے، اگلی مرتبہ کے لیے نیک تمنائیں۔‘
 

انڈیا کے وزیراعظم نریندر مودی نے اپنی ٹویٹ میں لکھا کہ ’ڈیئر ٹیم انڈیا، پورے ورلڈ کپ میں آپ کا ٹیلنٹ اور عزم قابلِ ستائش تھا۔ آپ نے بھرپور عزم کے ساتھ کھیلا اور یہ قوم کے لیے بہت فخر کی بات ہے۔ ہم آج اور ہمیشہ آپ کے ساتھ ہیں۔‘
 

پاکستان ٹیم کے سٹار بیٹر بابر اعظم نے انسٹاگرام پر لکھا کہ ’آسٹریلیا کو مبارک ہو۔ فائنل میں کیا شاندار کارکردگی دکھائی ہے۔‘

احمد آباد کے نریندر مودی سٹیڈیم میں فائنل میں انڈین ٹیم کی فائنل میں ناقص کارکردگی پر پورے میچ کے دوران 1 لاکھ 30 ہزار تماشائیوں کے باجود سناٹا رہا۔ اس بارے میں بنٹی نامی صارف نے لکھا کہ ’ایسا لگ رہا ہے آسٹریلین ٹیم قبرستان میں جشن منا رہی ہے۔ اتنی خاموشی۔‘
 

جونز نے وراٹ کوہلی کی تصویر شیئر کرتے ہوئے لکھا کہ ’یہ دیکھتے ہوئے بہت دکھ ہو رہا ہے۔‘
 

وِل میکفیرسن لکھتے ہیں کہ ’انڈین فینز گھبرائیں نہیں، آپ وشاکاپٹنم میں جمعرات سے شروع ہونے والی پانچ ٹی20 میچوں کی سیریز جیت کر آسٹریلیا سے بدلہ لے سکتے ہیں۔’
 

کرسٹیانو رونا ڈال دو نے لکھا کہ ’سارا کریڈٹ پیٹ کمنز کو جاتا ہے جنہوں نے پِچ کی تصویریں لیں اور پھر وہیں سو گئے تاکہ انڈینز اُسے تبدیل نہ کر سکیں۔ لیجنڈ‘
 

شاشانک بلناد نے تبصرہ کیا کہ ’کسی بھی کھیل سے جذباتی لگاؤ صحت کے لیے مضر ہے۔ میرا اس کھیل سے لگاؤ آج ختم ہوگیا ہے۔’
 

راہُل دیسائی نے لکھا کہ ’روہت، وراٹ، ڈراوڈ اور باقی لڑکوں کے لیے بہت برا لگ رہا ہے۔ آج مائنڈ سیٹ ٹھیک نہیں تھا۔ ایک اور فائنل ہارنے کا خوب واضح تھا۔ لیکن مجھے ابھی بھی سمجھ نہیں آ رہی کہ مجھے کیوں نہیں دکھ ہو رہا۔‘