حکومت پاکستان کا امیر کویت کی وفات پر ایک روزہ ’قومی یوم سوگ‘ منانے کا اعلان
اتوار 17 دسمبر 2023 17:33
انوارالحق کاکڑ امیر کویت کی وفات پر تعزیت کے لیے پیر کو کویت کا ایک روزہ دورہ کریں گے۔ (فوٹو: اے پی پی)
حکومت پاکستان نے امیر کویت شیخ نواف الاحمد الجابر الصباح کی وفات پر18 دسمبر کو ایک روزہ ’قومی سوگ‘ منانے کا اعلان کیا ہے۔
کابینہ سیکرٹریٹ کی جانب سے اتوار کو جاری نوٹیفکیشن کے مطابق نگران وزیر اعظم انوارالحق کاکڑ نے اعلان کیا ہے کہ پاکستان کے عوام اور حکومت کی طرف سے امیر کویت کی وفات پر کویتی عوام اور شاہی خاندان سے یکجہتی کے لیے 18 دسمبر کو ’قومی یوم سوگ‘ منایا جائے گا۔
اس موقع پر ملک بھر میں قومی پرچم سرنگوں رہے گا۔
دوسری جانب پاکستان کے دفتر خارجہ نے اعلان کیا ہے کہ نگران وزیر اعظم انوارالحق کاکڑ امیر کویت شیخ نواف الاحمد الجابر الصباح کی وفات پر تعزیت کے لیے پیر کو کویت کاایک روزہ دورہ کریں گے۔
بیان میں کہا گیا ہے کہ نگران وزیر اعظم انوارالحق کاکڑ دورے کے دوران کویت کے امیر کی وفات پر پاکستان کی حکومت اور عوام کی جانب سے شاہی خاندان، حکومت اور کویتی عوام سے تعزیت اور اظہار ہمدردی کریں گے۔
