مسجد الحرام میں جمعے کو زائرین اور نمازیوں کے لیے خصوصی انتظامات

مسجد الحرام و مسجد نبوی امور کی جنرل اتھارٹی جمعے کو زائرین کے لیے پہلے سے تمام انتظامات مکمل کیے تاکہ آنے والوں کو روحانی ماحول میسر ہو۔

سعودی خبررساں ادارے ’ایس پی اے‘ کے مطابق اتھارٹی کا کہنا ہے جمعے کو مسجد الحرام آنے والے  عمرہ زائرین اور نمازیوں کی سہولت کے لیے ’سپیشل پلان‘ تیار کیا جاتا ہے۔

عمرہ زائرین کے لیے 5 ہزار کے قریب الیکٹرانک و سادہ گاڑیاں (ویل چیئرز) ’تنقل‘ ایپ کے ذریعے فراہم کی جاتی ہیں۔

 اس بارے میں آگاہ کیا جاتا ہے کہ کس طرح تنقل ایپ کے ذریعے قبل ازوقت بکنگ کرائی جاسکتی ہے۔ اس کے علاوہ پہلی مرتبہ الیکٹرانک گاڑیاں استعمال کرنے والوں کو تمام معلومات دی جاتی ہیں۔

اتھارٹی نے بتایا مسجد الحرام و مسجد نبوی کے داخلی دروازوں پر تعینات اہلکار زائرین مختلف استفسارات کے جواب دیتے ہیں۔ نیز مذہبی استفسارات کے لیے دونوں مساجد میں مختلف جگہوں پر سکرینز نصب کی گئی ہیں جہاں براہ راست استفسارات کے فوری جوابات دیے جاتے ہیں۔ 

جنرل اتھارٹی کا کہنا ہےہ 24 گھنٹے زائرین کے سوالات و رہنمائی کے لیے لینڈ لائن یا موبائل فون پر مختلف شرعی سوالات کے جواب کے لیے 2 ٹول فری نمبر بھی مختص کیے گئے ہیں۔ 

حرمین اتھارٹی کا کہنا ہے جدید ٹیکنالوجی کا استعمال کرتے ہوئے موبائل پر سمارٹ ایپلی کیشنز کے ذریعے خطبہ جمعہ کا مختلف زبانوں میں فوری ترجمے کی بھی سہولت فراہم کی جارہی ہے اس کے علاوہ دینی آگہی و رہنمائی کے لیے حرمین شریفین کے مختلف حصوں میں ہر روز لیکچرز کے انتظامات کیے جاتے ہیں۔

 مسجد الحرام کے صحنوں میں صفائی ستھرائی کا بھی خاص انتظام کیا جاتا ہے۔  مسجد کے ہر حصے کو معطر کرنے کا بھی اہتمام وقفے وقفے سے کیا جاتا ہے۔ 

اتھارٹی نے بتایا کہ جمعے کے لیے خاص انتظامات میں سینیٹائزنگ، ماحول کو معطر کرنا، صحن اور مختلف حصوں کی دھلائی اور صفائی کا بہترین انتظام شامل ہے۔

اتھارٹی نے مزید بتایا  زائرین حرم کو ٹھنڈا اور سادہ  زم زم ہر وقت فراہم کیا جاتا ہے۔ کولرز کی صفائی کا بھی خاص خیال رکھا جاتا ہے اس کے علاوہ مسجد الحرام آنے والوں کو زم زم کی بوتلیں بھی فراہم کی جاتی ہیں۔ صحن حرم میں زم زم پلانے والے  اہلکار بھی تعینات ہوتے ہیں۔

 مسجد الحرام کے مختلف حصوں میں سیکیورٹی اہلکار تعینات ہیں جو آمد ورفت کو منظم رکھنے کے لیے اپنا کردار احسن طریقے سے ادا کرتے ہیں۔ راستہ بھول جانے والوں کی رہنمائی بھی کی جاتی ہے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں