سنی اتحاد کونسل کی جانب سے قومی اسمبلی میں زرتاج گل پارلیمانی لیڈر نامزد
زرتاج گل کو قومی اسمبلی میں سنی اتحاد کونسل کی پارلیمانی لیڈر کے طور پر نامزد کیا گیا۔ فوٹو: زرتاج گل انسٹا
پاکستان تحریک انصاف کے بانی عمران خان نے قومی اسمبلی میں پارلیمانی لیڈر کے لیے زرتاج گل کو نامزد کرنے کی منظوری دے دی ہے۔
سنیچر کو پارٹی کے سیکریٹری جنرل عمر ایوب نے سوشل میڈیا پلیٹ فارم ایکس پر لکھا کہ عمران خان نے پارلیمان میں مختلف عہدوں کے لیے تین ارکان کے ناموں کی منظوری دی ہے۔
عمران خان نے جن ناموں کی منظوری دی ہے، اس کے تحت سنی اتحاد کونسل کی جانب سے زرتاج گل پارلیمانی لیڈر ہوں گی۔
زین قریشی اور احمد چھٹہ کو قومی اسمبلی میں بطور ڈپٹی پارلیمانی لیڈر نامزد کیا ہے۔
پی ٹی آئی نے قومی اسمبلی میں پارلیمانی لیڈر کے لیے چار نام تجویز کیے تھے۔
پارلیمانی لیڈر کے لیے زرتاج گل، صاحبزادہ محبوب سلطان، زین قریشی اور احمد چھٹہ کا نام تجویز کیا گیا تھا تاہم عمران خان نے زرتاج گل کی نامزدگی کی منظوری دی ہے۔
عمر ایوب کے مطابق پیر کو سنی اتحاد کونسل کے سربراہ زرتاج گل کی باقاعدہ نامزدگی کے بارے میں سپیکر قومی اسمبلی کو آگاہ کریں گے۔
